Скопје повторно влегува во истата надеж: нов тендер за 100 автобуси и ветување дека овојпат постапката ќе успее. По години чекање по станици, редуцирани линии, расипани возила и нервозни патници, главното прашање е едноставно: дали новата набавка конечно ќе ја скрати маката на граѓаните со јавниот превоз?

Градоначалникот на Град Скопје, Орце Ѓорѓиевски, во гостување во емисијата „Само интервју“ на Канал 5 изјави дека постапката за набавка на 100 автобуси е повторно распишана и дека очекува овојпат успешно да биде завршена.

Сто автобуси од Владата, 40 за БРТ системот

Според најавите, набавката на 100 автобуси треба да оди преку поддршка од Владата, додека Град Скопје паралелно планира да обезбеди 40 автобуси за брзиот автобуски систем, познат како БРТ.

Ѓорѓиевски најави дека административните постапки за БРТ треба да завршат до крајот на годината, а од следната година да почне реализацијата на проектот.

„Постапките треба да ги завршиме до крајот на оваа година, здравје од наредната да ставиме темели“, изјави градоначалникот.

Јавниот превоз не може да чека уште еден неуспешен тендер

Новиот тендер доаѓа во момент кога јавниот превоз во Скопје со години е една од најболните градски теми. Граѓаните секојдневно се соочуваат со доцнење на автобуси, недоволен број возила, пренатрупани линии и неизвесност дали воопшто ќе стигнат навреме на работа, факултет, лекар или училиште.

Токму затоа оваа набавка не е само административна постапка, туку тест дали градот конечно ќе почне да го решава проблемот што директно го чувствуваат илјадници патници секој ден. Нови автобуси би значеле почести линии, помалку чекање, подобра поврзаност и барем делумно враќање на довербата во јавниот превоз.

Ревизии, камиони и претоварни станици

Во интервјуто, Ѓорѓиевски посочи дека во моментов се вршат ревизии и дека финансиската полиција и други институции постапуваат по одредени предмети, најавувајќи дека ќе има одговорност.

Во делот на комуналната хигиена, информираше дека е завршена тендерската постапка за набавка на 40 камиони, од кои дел ќе бидат цистерни за миење улици. Најави и нов систем за транспорт на отпад преку претоварни станици, со цел камионите да не одат директно до Дрисла од сите делови на градот.

Но, за граѓаните најитното прашање останува јавниот превоз. Претходниот тендер за автобуси не успеа, а Скопје продолжи да се движи со старите проблеми: малку автобуси, многу чекање и премногу нервоза. Затоа новата постапка за 100 автобуси ќе се мери не по најавите, туку по тоа дали конечно ќе донесе возила на улица и нормален превоз за патниците.