Топлотните бранови не завршуваат со заоѓањето на сонцето. Сè почесто високите температури се задржуваат и во текот на ноќта, оставајќи го телото без можност да се разлади и да влезе во нормален, длабок сон.
Истражување во Велика Британија покажало дека за време на јунските горештини 65 проценти од возрасните поминувале по три или повеќе часа будни во текот на ноќта.
Проблемот не е само во непријатноста. Научниците предупредуваат дека нарушениот сон поради жештината постепено може да стане сериозен јавно-здравствен проблем.
Зошто тешко заспиваме кога е топло?
За да заспиеме, температурата во внатрешноста на телото природно треба да се намали. Тој процес е дел од биолошкиот сигнал дека е време за одмор и е поврзан со лачењето мелатонин.
Кога просторијата е премногу топла, особено ако има и висока влажност, телото потешко ја ослободува топлината. Резултатот е подолго превртување во креветот, почесто будење и пократок престој во длабоките и РЕМ-фазите на сонот.
Фрустрацијата дополнително го влошува проблемот. Гледањето во часовникот и размислувањето за тоа колку ќе бидеме уморни следниот ден го активираат стресниот одговор на организмот и уште повеќе го одложуваат заспивањето.
До 40 проценти поголем ризик од помалку од шест часа сон
Меѓународен тим научници анализирал податоци од 165 милиони преспиени ноќи на речиси 318.000 корисници на уреди за следење на сонот.
Резултатите покажале дека кога ноќната температура ќе се зголеми од околу 12 на 27 степени, веројатноста човекот да спие помалку од шест часа расте за околу 40 проценти.
Посебно загрижува тоа што ноќните температури во многу делови од светот растат побрзо од дневните. За жителите на градовите дополнителен проблем е асфалтот, бетонот и густата градба, кои ја задржуваат топлината долго по заоѓањето на сонцето.
Што му прави недостигот од сон на организмот?
Една или две лошо преспиени ноќи обично предизвикуваат умор, раздразливост, послаба концентрација и побавно реагирање. Но кога недостигот од сон се повторува, последиците се натрупуваат.
Спиењето е неопходно за нормално функционирање на меморијата, имунолошкиот систем, метаболизмот и емоционалната рамнотежа.
Хронично нарушениот и недоволен сон се поврзува со зголемен ризик од:
- Депресија и анксиозност;
- Кардиоваскуларни заболувања;
- Дијабетес;
- Дебелина и нарушен метаболизам;
- Ослабен имунолошки одговор;
- Намалена концентрација и меморија.
На општествено ниво, недоволното спиење се поврзува и со пониска работна продуктивност, послаби резултати во учењето и зголемен ризик од сообраќајни и работни несреќи.
Кој е најзагрозен?
Жештината најсилно го нарушува сонот кај повозрасните, малите деца, бремените жени и хронично болните лица.
Повеќе се погодени и домаќинствата со пониски приходи, кои често живеат во станови со послаба изолација и проветрување или немаат можност да користат климатизација.
Истражувачите проценуваат дека луѓето во посиромашните земји и граѓаните со ниски приходи во богатите држави можат да бидат и до трипати почесто погодени од несоница предизвикана од високите температури.
Како полесно да заспиете во жешка ноќ?
Во текот на денот држете ги ролетните и завесите затворени за да спречите загревање на просторијата. Отворете ги прозорците дури кога надворешната температура ќе се намали.
Користете лесна и проветрива постелнина од природни материјали, како памук или лен. Вентилаторот може да помогне во движењето на воздухот, додека климатизерот е најефикасен за намалување на температурата.
Пред спиење може да помогне туширање со млака вода или ставање студена, влажна крпа на вратот и зглобовите.
Во вечерните часови избегнувајте:
- Алкохол и кофеин;
- Обилни и тешки оброци;
- Интензивно вежбање непосредно пред спиење;
- Силно осветлување и непотребно вклучени електронски уреди.
Треба да се внесува доволно вода во текот на денот, но не и големи количества непосредно пред легнувањето, бидејќи честото одење во тоалет дополнително го прекинува сонот.
Ако не можете да заспиете, експертите советуваат да не останувате во кревет нервозни и да не го гледате часовникот. Станете, обидете се да се разладите и вратете се во кревет кога повторно ќе почувствувате поспаност.
Извор: Дојче веле
