Возачите во Македонија имаат уште малку време да ги подготват возилата за зимските услови. Од 15 ноември почнува законската обврска за задолжително поседување зимска опрема, која ќе важи до 15 март 2027 година. Правилото важи без оглед на моменталните временски услови, па возачите треба навреме да проверат дали нивните гуми и дополнителната опрема ги исполнуваат законските барања.

Според Министерството за внатрешни работи, за патничките возила со најголема дозволена маса до 3.500 килограми, зимската опрема подразбира зимски гуми на сите четири тркала со минимална длабочина на шарата од четири милиметри. Како алтернатива, дозволени се летни гуми на сите четири тркала со шара длабока најмалку четири милиметри, но возилото мора да има и синџири за снег со соодветна големина за погонските тркала.

За возилата со погон на четири тркала, односно 4×4, важат посебни услови. Зимските гуми треба да имаат шара длабока најмалку шест милиметри. Ако се користат летни гуми со шара од најмалку четири милиметри, во возилото мора да има синџири за снег. Нивното поставување зависи од видот на погонот на возилото.

Кај возилата со најголема дозволена маса над 3.500 килограми, зимските гуми треба да бидат поставени на погонските тркала и да имаат шара длабока најмалку шест милиметри. Прописите предвидуваат и соодветни синџири за снег при користење летни гуми, додека автобусите и товарните возила што од технички причини не можат да постават синџири треба да имаат зимски гуми на погонските тркала и прирачен алат, односно лопата.

Зимските гуми се препознаваат според ознаките „М+С“, „М/С“, „М-С“ или „М&S“, како и според симболот на снегулка на стилизирана планина со три врва. Во патниот сообраќај е забрането користење гуми со клинци.

Колкава е казната ако немате зимска опрема?

Според информациите објавени во медиумите повикувајќи се на законските одредби, за непочитување на обврската е предвидена глоба од 45 евра. Полицијата може да го запре понатамошното движење на возилото ако нема пропишана опрема, особено кога временските услови не овозможуваат безбедно одвивање на сообраќајот.

Од МВР апелираат возачите навреме да ги подготват возилата и да ја почитуваат законската обврска, бидејќи соодветната опрема е важна за безбедно возење во зимски услови.