Главниот град на Северна Ирска, Белфаст, втор ден по ред е поприште на жестоки улични судири и етнички тензии кои се закануваат сериозно да ја нарушат безбедносната состојба во земјата.

Како што пренесуваат меѓународните медиуми, полициските сили биле принудени да употребат водени топови и специјални единици за разбивање демонстрации за да го сузбијат насилниот бран на ксенофобични протести што го блокираа градот.

Овие масовни немири и улични судири во Северна Ирска избувнаа како бран на ксенофобичен револт по брзото ширење на видеоснимка на социјалните мрежи, на која е прикажан брутален напад со нож наводно извршен од страна на мигрант.

Демонстрантите, поттикнати од масовното ширење на лажни и непроверени информации на интернет, излегоа на улиците барајќи поригорозни антиимиграциски мерки и директно се судрија со безбедносните сили.

И покрај апелите за смиреност од страна на политичките лидери, демонстрантите ноќеска ги нападнаа полицајците со запаливи коктели, камења и пиротехника, додека властите предупредуваат дека социјалните мрежи намерно се користат за поттикнување на институционален хаос и расистички напади низ британското општество.