Во ноќен напад со дронови врз туристички камп во окупираниот дел од украинскиот регион Запорожје загинаа 12 лица, меѓу кои пет деца, соопштија локалните власти назначени од Москва. Новиот напад во Запорожје ја погоди рекреативната зона во Кириловка на брегот на Азовското Море, при што беа ранети уште 19 лица. Официјален Киев засега нема реакција на обвинувањата.

Нападот се случил во летниот центар Кириловка, кој се наоѓа во близина на Мелитопол. Според информациите од назначениот руски гувернер Евгениј Балицки, спасувачките екипи од руското Министерство за вонредни ситуации извлекле две преживеани лица од урнатините, од кои едното било дете, а извадиле и уште едно тело. Балицки потврди дека спасувачките операции се завршени.

Видеоснимките објавени на интернет прикажуваат уништени објекти, изгорени возила и куп урнатини веднаш до базен во кампот. Балицки на апликацијата Телеграм објави дека нападот бил свесно насочен и дека властите во Киев ги игнорираат сите морални норми.

Портпаролката на руското Министерство за надворешни работи, Марија Захарова, изјави дека украинските дронови ги нападнале луѓето додека спиеле во одморалиштето. Таа го осуди овој чин како злосторство и го спомена и нападот врз фабрика во рускиот регион Киров од четвртокот, каде што загинаа шест лица.

Рускиот Истражен комитет веднаш покрена кривична постапка за тероризам, објави руската државна новинска агенција РИА. Двете страни во војната што започна со целосна инвазија на Русија во февруари 2022 година, континуирано негираат дека нивна мета се цивилите.