САД нудат награда до 20 милиони долари за информации за иранската нуклеарна програма, соопшти американската Централна команда. Покрај паричниот надоместок, предвидена е и можност за преселување на лицата што ќе обезбедат информации.

Понудата е дел од програмата „Награди за правда“ на американскиот Стејт департмент, пренесува „Еуроњуз“.

Што бара Вашингтон за иранската нуклеарна програма?

Повикот се однесува на информации за нуклеарни објекти, опрема и поврзан персонал, вклучително и лица од научната заедница. Се бараат и податоци за нивното движење или преместување.

Стејт департментот ја образложува понудата со тврдење дека непочитувањето на обврските кон Меѓународната агенција за атомска енергија го нарушило континуираниот увид на агенцијата во производството и залихите на клучни компоненти, меѓу кои и центрифугите.

Награда во време на преговори

Американскиот претседател Доналд Трамп во петокот, 6 ноември, повтори дека САД нема да дозволат Иран да се здобие со нуклеарно оружје.

Нуклеарното прашање останува во средиштето на преговорите за завршување на војната. Иранскиот претседател Масуд Пезешкијан потврди дека неговата влада продолжува со напорите конфликтот да се реши преку дијалог.