Цените на нафтата продолжија да паѓаат на светските берзи, откако сигналите за можно нормализирање на односите меѓу Соединетите Американски Држави и Иран ги намалија стравувањата од нови нарушувања во глобалното снабдување со енергенси. Европската референтна нафта „Брент“ во средата се спушти под психолошката граница од 79 долари за барел и се тргуваше по цена од 78,44 долари, што е пад од 0,66 проценти. Истовремено, американската лесна нафта WTI ослабе за 1,03 проценти и достигна 75,23 долари за барел.
Подоцна во текот на денот цените благо се стабилизираа, но останаа во близина на најниските нивоа забележани во последните три месеци. Главен двигател на падот се очекувањата дека привремениот договор меѓу Вашингтон и Техеран ќе доведе до повторно отворање на Ормутскиот Теснец и постепено враќање на иранската нафта на меѓународните пазари.
Пазарите позитивно реагираат на можноста за ублажување на санкциите врз иранскиот извоз на нафта, што би можело да ја зголеми понудата и да го намали ризикот од недостиг на сурова нафта. Ормутскиот Теснец е една од најважните светски поморски артерии низ која минува значителен дел од глобалната трговија со нафта и течен природен гас.
Дополнителен притисок врз цените создаде и најновата прогноза на Меѓународната агенција за енергетика (IEA), според која светот би можел да се соочи со значителен вишок на понуда во наредните години. Агенцијата проценува дека до 2027 година глобалното производство би можело да ја надмине побарувачката за околу шест милиони барели дневно. И покрај моменталниот оптимизам, инвеститорите остануваат внимателни. Аналитичарите предупредуваат дека целосното враќање на иранското производство и извоз нема да биде брз процес, а состојбата на Блискиот Исток и натаму останува клучен фактор што може да предизвика нови ценовни турбуленции.
Пониските цени на нафтата потенцијално носат олеснување за глобалната економија, бидејќи можат да придонесат за намалување на инфлацијата и трошоците за транспорт и производство. Сепак, ефектите врз цените на горивата за граѓаните ќе зависат и од курсот на доларот, даночната политика и националните механизми за формирање на цените.
