Цената на суровата нафта „Брент“ за првпат по подолг период ја надмина психолошката граница од 100 долари за барел, откако ескалацијата на конфликтот на Блискиот Исток повторно ги зголеми стравувањата од нарушување на глобалното снабдување со енергенси. Во текот на тргувањето, „Брент“ достигна 100,17 долари за барел, што претставува раст од повеќе од 6,5 проценти во споредба со претходното затворање на 94,07 долари.

Истовремено, американската сурова нафта WTI се искачи на 91,54 долари за барел, односно за 5,46 проценти повеќе во однос на претходната трговска сесија.

Новиот ценовен скок следува по нападите на јеменските Хути врз нафтени танкери во Црвеното Море, со што беше загрозена една од најважните извозни маршрути што Саудиска Арабија ја користи како алтернатива на Ормутскиот Теснец.

Пазарите стравуваат дека натамошната ескалација би можела дополнително да го ограничи транспортот на нафта, што веднаш се одразува врз светските берзи и цените на енергенсите.

Економистите предупредуваат дека повисоките цени на нафтата речиси секогаш се прелеваат во пошироката економија. Најдиректно се погодени бензинот и дизелот, но со зголемените транспортни трошоци поскапуваат и храната, суровините и голем број производи за широка потрошувачка.

Доколку цените продолжат да растат, тоа би можело повторно да го засили инфлацискиот притисок во многу земји, во период кога централните банки сè уште се обидуваат да ја стават инфлацијата под контрола.