На денешен ден, 14 април 1997 година, починал Видое Подгорец, еден од најзначајните македонски автори за деца и млади. Неговото творештво остави длабока трага во домашната книжевност, а неговите книги и денес се дел од растењето на многу генерации читатели.
Подгорец не беше само плоден писател, туку автор со исклучително широк и разновиден опус. Институтот за македонска литература го вбројува меѓу столбовите на современата македонска литература за деца, а зад себе оставил 108 книги во различни жанрови, од поезија и раскази до романи, патописи и критика.
Во неговото творештво се преплетуваат теми за минатото, војните, слободата, природата, современиот живот и судбината на македонскиот народ. Но она што особено го издвојува е начинот на кој им се приближуваше на децата: со јазик кој беше близок, топол и човечен, без да ја изгуби книжевната тежина. Токму затоа, Подгорец и денес се памети како писател што не им пишуваше на децата од далечина, туку со вистинско разбирање за нивниот свет.
Една од неговите најпознати мисли силно го опишува неговиот однос кон пишувањето: писателот треба да остане будната совест на својот народ. Таа идеја не мора да се чита само како личен став, туку и како клуч за разбирање на неговото дело, кое низ децении остана врзано и за хуманоста, и за историската меморија, и за чувството на одговорност кон заедницата.
Подгорец е роден на 8 јуни 1934 година во Колешино, а неговиот животен пат бил тесно поврзан и со образованието и со издаваштвото. Работел како учител, инспектор и уредник, а токму непосредната работа со децата силно влијаела врз неговата определба за детската литература. Неговата прва книга поезија за деца, „Развигорче“, која била објавена во 1956 година.
Затоа и денес, кога се навршуваат 29 години од неговата смрт, Видое Подгорец не е само име од лектирите или од книжевната историја. Тој останува автор со кого растеле генерации деца и писател чие дело продолжува да живее и надвор од времето во кое било создадено.
