Американскиот технолошки гигант Microsoft и францускиот стартап за вештачка интелигенција Mistral AI објавија дека значително го прошируваат своето стратешко партнерство во Европа.

Според новиот договор, чија вредност се проценува на неколку милијарди евра, двете компании планираат да ги зголемат европските инфраструктурни капацитети за вештачка интелигенција и да интегрираат напредни AI модели во чувствителни економски сектори и јавни институции.

Точната вредност на договорот не е објавена.

Microsoft ќе користи европска инфраструктура развиена од Mistral

Со договорот, Microsoft се обврзува директно да користи делови од европската хардверска инфраструктура што ја развил Mistral.

Американската компанија на овој начин сака да одговори на брзорастечката побарувачка за услуги поврзани со управување со податоци и вештачка интелигенција во Европа.

Истовремено, Microsoft настојува да ги исполни и обврските за европска дигитализација преземени во 2025 година.

Решение за правни и регулаторни пречки

Европските компании и јавните институции често се соочуваат со правни и регулаторни предизвици кога користат американски решенија базирани на вештачка интелигенција, наведува германската агенција dpa.

Проширеното партнерство треба да помогне во надминување на тие пречки.

Со интеграцијата на европските AI модели на Mistral во портфолиото на Microsoft, корисниците треба да добијат пофлексибилни опции, соопштија компаниите.

Microsoft не се потпира само на OpenAI

Новиот договор ја нагласува стратегијата на Microsoft во областа на генеративната вештачка интелигенција.

Компанијата посочува дека не се потпира исклучиво на својот американски партнер OpenAI, туку уште во раните фази вклучува и други важни играчи од глобалниот AI екосистем.

За Mistral AI, компанија со седиште во Париз, продлабочувањето на соработката значи директен пристап до глобалната продажна мрежа на Microsoft.

Од француската компанија наведуваат дека договорот истовремено треба долгорочно да ја зајакне позицијата на Европа како центар за развој на вештачка интелигенција.