Лионел Меси испиша нови страници во историјата на светските првенства уште пред почетокот на финалето меѓу Аргентина и Шпанија, но првото полувреме му донесе и еден неславен личен рекорд. Со 39 години и 25 дена, аргентинскиот капитен стана највозрасниот играч во поле што настапил во финале на Светско првенство, надминувајќи го рекордот на Швеѓанецот Гунар Грен, кој во финалето во 1958 година имал 37 години и 241 ден. Единствен постар фудбалер што играл во финале останува легендарниот италијански голман Дино Ѕоф, кој во 1982 година имал 40 години и 133 дена.

Меси истовремено стана и првиот фудбалер во историјата кој бил стартер во три финалиња на Светските првенства. Бразилецот Кафу исто така има три финалиња, но во првото, во 1994 година, влезе како резерва.

Само еден допир за 15 минути

Иако влезе во историјата, почетокот на натпреварот не мина според очекувањата за аргентинската ѕвезда. Според статистиката на Opta, Меси во првите 15 минути од финалето имал само еден допир со топката – почетниот удар од центарот. Тоа е првпат во неговата кариера да има само еден контакт со топката во првите 15 минути од еден натпревар.

До крајот на првото полувреме забележа вкупно 15 допири, додека единствен играч со помалку беше Хулијан Алварез со осум. Аргентина во првите 45 минути не упати ниту еден удар кон голот, додека Шпанија имаше три обиди, од кои два беа во рамките на голот.