Повеќе од 14.500 матуранти следната сабота ќе го почнат полагањето на екстерните испити од матурата, првпат според новиот модел кој воведува три различни типа завршен испит. Според податоците на Државниот испитен центар, за полагање се пријавени вкупно 14.587 ученици, од кои 12.184 ќе полагаат државна матура, 2.276 државна стручна матура, а 127 кандидати државна уметничка матура.

Оваа година за првпат целосно ќе се применуваат измените во Законот за средното образование, со кои матурата веќе не е еден ист модел за сите ученици. Наместо тоа, завршниот испит ќе се полага според видот на образованието што учениците го завршиле: гимназиско, стручно или уметничко.

Матурата повеќе не е иста за сите

Гимназиските ученици полагаат исклучиво државна матура, а годинава за неа се пријавени 5.713 кандидати. Учениците од стручните и уметничките училишта, пак, имаат можност да избираат помеѓу државна матура и стручна, односно уметничка матура.

Од Државниот испитен центар информираат дека за секој тип матура се подготвени посебни испитни програми и тестови, базирани на наставните програми што учениците ги изучувале во текот на четиригодишното образование. Тоа значи дека тестирањето треба повеќе да одговара на реалната насока и знаење на учениците, наместо сите да влегуваат во ист испитен калап.

Матурантите повторно ќе полагаат во амфитеатри и големи простории

Полагањето и годинава ќе се организира во поголеми простории, како амфитеатри, предавални, читалници, фискултурни сали и други соодветни локации. Овој модел, според ДИЦ, се покажал како поефикасен за намалување на препишувањето и користењето мобилни телефони за време на испитот.

Дел од матурантите ќе полагаат и на универзитетски локации, особено во градовите каде што училиштата немаат доволно простор за организирање на испитите според новите правила. Целта е учениците да бидат распоредени во услови што овозможуваат поголема контрола, подобар надзор и пофер полагање.

ДИЦ: Подготвени сме за новиот модел

Директорката на Државниот испитен центар, Даниела Јовчевска-Михајловска, изјави дека подготовките се одвиваат според предвидената динамика и дека институцијата е подготвена за спроведување на новиот модел на матура.

„Целта е сите ученици да имаат еднакви услови и фер полагање. Организацијата бара поголем ангажман, но Државниот испитен центар е подготвен за овој предизвик“, изјави Јовчевска-Михајловска.

Матурата и годинава останува еден од најважните прагови за средношколците, но овојпат системот ќе се тестира заедно со нив. Не само колку знаат учениците, туку и дали новиот модел конечно може да донесе поправедно, попрецизно и помалку „снаодливо“ полагање.