Лондонски трговец со антиквитети презентираше „убедлива“ нова теорија за потеклото на холивудската награда.

Потеклото на наградите „Оскар“ долго време беше мистерија, дури и за многуте наградувани холивудски добитници.

Сега се појави тврдење дека статуетката на Академијата, излиена од бронза и позлатена со 24-каратно злато, е инспирирана од египетски бог, а не од крстоносен витез, како што се мислеше претходно.

Експерт за антиквитети тврди дека дизајнот на наградата Оскар е инспириран од скулптура на древниот египетски бог Птах, која некогаш била во сопственост на Лорд Амхерст, поранешен конзервативен пратеник кој ја претставувал изборната единица Западен Норфолк во 1880-тите.

Руперт Вајс, трговец со уметнички дела од Лондон, на лондонскиот саем за уметност Фриз изјави дека постои „убедлив аргумент“ дека скулптурата го инспирирала дизајнерот кој ја направил статуетката Оскар, објави Телеграф, според „Тајмс“ .

Лорд Амхерст бил страствен колекционер и собрал значајна колекција од египетски предмети, но неговото богатство било речиси уништено по измама извршена од управителот на неговиот имот.

Според истражувањето на Вајс, семејството Амхерст ја продало бронзената скулптура во 1920-тите на Рандолф Херст, американски медиумски магнат познат по борбата за тиражот на неговите весници со Џозеф Пулицер.

Вајс, кој ја продава бронзената скулптура за „шестцифрена сума“, рече дека е купена од фондот за аквизиција на уметнички дела на Херст, Меѓународната студиска арт корпорација.

Руперт Вајс верува дека статуетката на Оскар е инспирирана од оваа скулптура на древниот египетски бог Птах

Херст ја чувал својата египетска колекција во својот стан во Њујорк и во неговата вила Сан Симеон во Калифорнија, каде што се верува дека била изложена бронзената скулптура.

Во овој период, редовно го посетуваше Седрик Гибонс, уметничкиот директор на студијата „Метро-Голдвин-Мајер“ (МГМ), кој ги осмисли наградите „Оскар“.

Гибонс прво го излил дизајнот на Оскарот во бронза, како скулптурата на Птах, пред статуетката да биде позлатена и доделена на првите доделувања на Оскарите во 1929 година на победниците, меѓу кои и Чарли Чаплин.

„Убедлив аргумент“

Во древната египетска митологија, богот Птах го создал светот обликувајќи го според имагинацијата на своето срце.

Во различни периоди на подемот и падот на древните египетски империи, крунисувањата на фараоните се одржувале во храмови посветени на Птах.

Првосвештениците на овој бог биле толку високо ценети на Птоломејските дворови што дури се ожениле со принцези од кралска крв.

Зборувајќи на саемот Фриз, Вајс рече: „Визуелно, тоа е многу убедлив аргумент, а фактот дека сите актери поврзани со оваа приказна се познаваа зборува во прилог на тоа.“

„Не можеме категорично да го кажеме тоа, но не би го претставиле на продажба на тој начин ако не бевме убедени во тоа. Дури и без информации за неговото потекло, тоа е исклучителен, висококвалитетен предмет. Но, овие врски навистина го ставаат во сосема поинаков контекст.“

Академијата никогаш не ја потврдила поврзаноста со Птах, но тврди дека нејзината статуетка претставува „стилизирана фигура на витез кој држи крстоносен меч и стои на филмска лента“.

На нејзината веб-страница исто така се наведува дека „ниту еден модел не е користен за време на процесот на дизајнирање“.