Најмалку осум лица загинаа, а 34 се повредени во текот на ноќта во масовен руски напад со ракети и беспилотни летала врз Киев и неговата околина, јавува Kyiv Independent, повикувајќи се на украинските власти.
Според официјалните информации, седум лица загинале во главниот град, додека уште едно лице го загубило животот во Киевската област. Повредени се најмалку 24 лица во Киев и уште десет во околните населени места.
Уништени станбени згради и цивилна инфраструктура
Началникот на Киевската градска воена администрација, Тимур Ткаченко, соопшти дека во населбата Подил делумно е урната станбена зграда меѓу петтиот и деветтиот кат.
Погодени се и повеќе станбени згради во населбата Дарницки, а градоначалникот на Киев, Виталиј Кличко, информираше дека се уништени и нестанбени објекти, гаражи и магацин. Материјална штета е пријавена и во населбите Холосијивски и Дарницки.
Гувернерот на Киевската област, Микола Калашник, соопшти дека во Буча, Вишгород и Бровари се оштетени куќи, деловни објекти и друга цивилна инфраструктура.
Жителите ноќта ја поминаа во засолништа
Првите експлозии во Киев се слушнале околу 1:40 часот по локално време, а нови бранови напади следеле околу 2:10 и 3:15 часот. Украинското воено воздухопловство предупредило дека кон главниот град се движат десетици ракети, поради што илјадници жители побарале засолниште во станиците на метрото. Во предградието Софијивска Боршчахивка биле пријавени и прекини во снабдувањето со електрична енергија.
Воздушна тревога во текот на ноќта беше прогласена во речиси сите украински региони.
Во меѓувреме, полските воздухопловни сили соопштија дека превентивно ги подигнале своите борбени авиони за заштита на воздушниот простор поради ракетните лансирања.
Зеленски предупреди неколку часа претходно
Само неколку часа пред нападот, украинскиот претседател Володимир Зеленски предупреди дека Русија подготвува нов масовен напад врз Украина и ги повика граѓаните сериозно да ги сфатат воздушните тревоги.
„Разузнавачките информации повторно укажуваат дека Русите подготвуваат нов масовен напад“, изјави Зеленски, повикувајќи ги западните сојузници да ја забрзаат испораката на системите за противвоздушна одбрана „Патриот“.
Тој оцени дека нападот е „типичен за Путин“, посочувајќи дека се случил веднаш по американскиот Ден на независноста и непосредно пред самитот на НАТО во Анкара.
Напад пред самитот на НАТО
Нападот се случи два дена пред планираната средба меѓу Зеленски и американскиот претседател Доналд Трамп на маргините на самитот на НАТО, кој треба да се одржи на 8 јули во Анкара.
Неколку дена претходно, Трамп имаше телефонски разговор со рускиот претседател Владимир Путин, при што, според Кремљ, понудил помош за завршување на војната. Сепак, руските власти претходно најавија дека ќе продолжат со кампањата на масовни напади врз украинските градови.
Ова е втор голем напад врз Киев за неколку дена. Во нападот извршен на 2 јули загинаа 31 лице, а 102 беа повредени.
