Македонското еколошко друштво одржа тридневна прекугранична обука за мониторинг на природата на планината Јабланица, каде што 22 учесници од Македонија и Албанија ги учеа методите за заштита на тресетиштата, птиците, тритоните и вилинските коњчиња. Активноста е дел од поширок проект за подобрување на управувањето со заштитените подрачја во шесте земји од Западен Балкан, со фокус на локациите опфатени во мрежите Емералд и Натура 2000.
Обуката се одвиваше од 29 до 31 јули на неколку клучни локации на Јабланица. На локалитетот Вевчанска Голина учесниците ги практикуваа методите за мониторинг на птиците, додека теренските активности на Лабунишкото и Подгоречкото Езеро беа посветени на следење на состојбата на тресетиштата, тритоните и вилинските коњчиња.
Едукативниот процес го водеа експерти од Природно-математичкиот факултет во Скопје, кои им овозможија на учесниците практично да ја совладаат методологијата за собирање податоци на терен.
На обуката учествуваа 22 претставници од Македонија и Албанија, меѓу кои беа застапени службеници од општините, јавните установи, граѓанските организации, како и локални ловци и планинари. Со ваквиот сеопфатен пристап, учесниците добија можност подобро да ја разберат улогата на специфичните видови во екосистемите и потребата од нивна системска заштита.
Преку зајакнување на капацитетите на сите засегнати страни, иницијативата овозможува подобро спроведување на законските обврски во управувањето со заштитените подрачја.
Оваа активност е дел од регионалниот проект насочен кон зајакнување на управувањето со прекуграничните заштитени подрачја во Западен Балкан. Во фокусот се пилот-подрачјата Јабланица – Шебеник и Проклетие – Албански Алпи, кои се дел од европските мрежи за заштита Емералд и Натура 2000.
Главните цели на иницијативата вклучуваат хармонизација на управувањето на прекугранично ниво во согласност со директивите на ЕУ, подобрување на интеграцијата на податоците од мониторингот во плановите за управување, како и подигање на свеста кај бизнисите и носителите на одлуки.
