Кога се уредува домот, желбата за луксузен изглед лесно може да доведе до големи трошоци за детали кои по некое време повеќе изгледаат како непотребен раскош отколку како добро осмислен дел од ентериерот. Токму затоа дизајнерите предупредуваат дека високата цена сама по себе не е гаранција дека нешто ќе го направи домот поубав или пофункционален.

Според анализата на „Хаус Бјутифул“, пренесена од „Индекс“, постојат повеќе решенија кои во последните години станаа симбол за луксуз, но дизајнерите сметаат дека често се преценети. 

1. Преголеми светилки

Големите и впечатливи лустери можат да бидат интересен детаљ, но кога нивната големина станува главна карактеристика на просторот, можат да го направат ентериерот визуелно тежок.

Дизајнерката Џен Дин смета дека интересна силуета или убави детали можат да остават многу подобар впечаток од огромна светилка која доминира со целиот плафон. 

2. Паметна технологија што повеќе комплицира отколку што помага

Автоматизираниот дом звучи како врв на удобноста, но ако за вклучување светло, подигнување ролетни или регулирање температура се потребни повеќе апликации и постојана техничка поддршка, технологијата ја губи својата смисла.

Според дизајнерката Двира Овадија, најдобрата технологија е онаа што е едноставна, интуитивна и речиси незабележлива. 

3. Белата „облак“ софа

Белата софа со мек и обемен изглед долго време беше еден од омилените трендови во уредувањето на домот.

Но, токму затоа што станува збор за парче мебел што се користи секојдневно, белата боја брзо може да стане проблем. Дизајнерката Амбер Гајтон смета дека ваквата софа не мора автоматски да изгледа луксузно и предлага наместо неа да се избере софа со впечатлива боја. 

4. Посебни простории за дегустација

Просториите наменети исклучиво за дегустација на вино или бурбон можеби звучат раскошно, но за многу домови се непрактични.

Дизајнерката Отамн Почиро смета дека истиот простор може подобро да се искористи како повеќенаменска просторија за одмор, библиотека или дел од трпезаријата. 

5. Огромни простории

Голема трпезарија, високи плафони и огромна спална соба можат да изгледаат импресивно, но квадратурата сама по себе не создава чувство на луксуз.

Преголемата просторија може да делува студено, да биде тешка за уредување и да бара повеќе средства за греење, опремување и одржување. Добро пропорциониран простор со внимателно избрани детали често може да изгледа многу пософистицирано. 

6. Премногу мермер

Мермерот е скап и безвременски материјал, но кога се користи речиси на секоја површина во домот, може да го изгуби ефектот.

Дизајнерите советуваат природниот камен да се користи селективно и да се комбинира со дрво, метал, малтер и текстил за просторот да добие повеќе топлина и слоевитост. 

7. Претерано истакнување на дизајнерските брендови

Луксузниот ентериер не мора да биде полн со препознатливи логоа и скапи брендови.

Дизајнерката Хилари Коен советува да се избираат предмети што предизвикуваат емоција и се квалитетни, наместо просторот да се претвора во изложбен салон на познати имиња. 

8. Огледално поставен мермер

Таканареченото „книга отворање“, односно поставување на две камени плочи така што шарите се огледално спојуваат, може да изгледа спектакуларно.

Но, кога истиот ефект се повторува на кујнски ѕидови, туш кабини, камини и други површини, ентериерот може да почне да изгледа претерано наместено наместо префинето. 

9. Кујна целосно обложена со камен

Кујнски остров, работни површини, полици и ѕидови изработени од ист камен несомнено покажуваат дека во просторот е вложено многу.

Но, според дизајнерите, количината на скап материјал не е исто што и луксуз. Прекумерната употреба на камен може да ја намали длабочината и разновидноста на ентериерот. 

10. Работни површини што се спуштаат до подот

Работните површини на кујнските острови што продолжуваат вертикално до подот некогаш беа речиси задолжителен знак за модерна и луксузна кујна.

Денес, според дизајнерите, станале толку чести што почнуваат да изгледаат генерички наместо посебно. 

11. Бел даб насекаде

Бел даб на подот, шкафовите и мебелот може да создаде убав и топол простор.

Проблемот настанува кога целиот дом е во речиси идентична нијанса. Тогаш просторот може да ја изгуби визуелната длабочина и разновидноста. 

12. Осветлен камен

Ониксот или проѕирниот кварц со осветлување од задната страна можат да создадат спектакуларен ефект.

Но, ако ваквиот материјал се користи во преголема мера, на пример во цела туш кабина или по должината на целиот бар, резултатот според дизајнерите може да потсетува повеќе на ноќен клуб отколку на елегантен дом. 

13. Премногу лакови

Заоблените архитектонски форми можат да му дадат карактер на просторот, но кога лакови се појавуваат речиси насекаде, ефектот може да стане претеран.

Дизајнерите советуваат еден или два впечатливи заоблени елементи, особено кога се спротивставени на прави линии, наместо целиот дом да биде исполнет со исти форми. 

14. Чешми над шпоретот

Чешмите поставени директно над шпоретот се сметаат за практичен додаток, бидејќи овозможуваат полнење на големите садови без нивно носење од мијалникот.

Но, дизајнерката Мур смета дека нивната практичност е преценета и дека мал број клиенти навистина ги користат редовно. Иако изгледаат убаво, не се неопходни за секоја кујна. 

15. Огромни гардеробери

Голем гардеробер со простор за облека, обувки и додатоци звучи како остварување на сонот за луксузен дом.

Но, ако просторот не е добро испланиран, може да изгледа празно и непрактично, а облеката лесно да се изгуби во голем број полици и прегради. 

Она што дизајнерите го издвојуваат како заедничка нишка кај сите овие примери е дека луксузот не зависи само од цената на материјалите или големината на просторот. Добро осмислениот ентериер повеќе се потпира на пропорции, функционалност, квалитет и внимателно комбинирање на различни материјали и детали.