Луиџи Манџоне денеска пред федералниот суд во Њујорк ја призна вината за убиството на Брајан Томпсон, извршен директор на најголемото американско друштво за здравствено осигурување „ЈунајтедХелткер“. Триесет и четиригодишниот Манџоне изјави дека утрото на 4 декември 2024 година го застрелал Томпсон пред хотел во Менхетен, за да го изрази својот револт од функционирањето на приватните осигурителни компании во Соединетите Американски Држави.

„Утрото на 4 декември го застрелав господинот Томпсон во Менхетен и тој почина“, изјави Манџоне за време на сослушувањето, потврдувајќи ја својата вмешаност во нападот што го шокираше американскиот деловен сектор.

Семејството на убиениот директор изјави дека ништо не може да ја ублажи болката од нивната загуба, но побара изречената казна во потполност да одговара на сериозноста на извршениот чин. Судијата го закажа официјалното изрекување на казната за 18 декември.

Правните застапници на Манџоне во меѓувреме поднесоа барање за прекин на постапката што против него се води пред судот на сојузната држава Њујорк. Адвокатскиот тим се повикува на уставното правило дека на едно лице не може двапати да му се суди за истото казнено дело, со оглед на тоа што тој веќе ја призна вината по федералната обвинителна актa.

Нападот се случи во декември 2024 година, кога педесетгодишниот Томпсон беше застрелан во грб веднаш по излегувањето од неговиот хотел. Случајот отвори широка јавна дебата во САД за пристапот до здравствена заштита и практиките на осигурителните компании.