Доењето носи бројни придобивки за бебето и мајката, но во периодот кога жената дои може да се појави потреба од лекување поради главоболка, забоболка, температура, инфекции, болки или други здравствени проблеми. Тогаш често се поставува истото прашање: дали терапијата значи дека доењето мора да престане?

Во повеќето случаи, не.

Светската здравствена организација наведува дека повеќето лекови може да се земаат за време на доењето без да му наштетат на бебето. Сепак, тоа не значи дека секој лек е безбеден, па терапијата секогаш треба да се процени индивидуално.

Млекото има значајна улога во растот и развојот на бебето. Светската здравствена организација препорачува исклучиво доење во првите шест месеци, а потоа продолжување на доењето заедно со соодветна дополнителна храна до две години и подолго, доколку тоа им одговара на мајката и детето.

Токму затоа, прекинувањето на доењето не треба да биде автоматска реакција кога е потребен лек.

При изборот на терапија лекарот треба да процени дали активната состојка преминува во мајчиното млеко, во која количина и дали може да има влијание врз бебето. Значајни се и возраста и здравствената состојба на детето, како и дозата и времетраењето на терапијата.

Светската здравствена организација посочува дека постојат многу малку видови лекување при кои доењето е апсолутно забрането. Во случаи кога одреден лек може да предизвика несакани ефекти кај бебето, често постои можност за избор на друга терапија со помал ризик.

Поради тоа, мајката не треба самостојно да го прекинува доењето или да ја прекинува пропишаната терапија. Наместо тоа, потребно е да разговара со лекар или фармацевт и да го наведе фактот дека дои.

Особено важно е да не се користат лекови само врз основа на информација од интернет, совет од пријатели или искуство на друга мајка. Лек кој бил безбеден за една жена не мора да биде соодветен и за друга, бидејќи различни се дозата, здравствената состојба и возраста на детето.

За одредени лекови постојат специјализирани бази на податоци и советувалишта кои ги проценуваат ризиците при доење. Светската здравствена организација меѓу ресурсите за проверка на лекови ги наведува и специјализираните сервиси како „Е лактација“, „ИнфантРиск“ и „ЛактМед“.

Во ретки ситуации може да биде потребен привремен прекин на доењето, но и тогаш одлуката треба да биде донесена со медицинска проценка. Светската здравствена организација нагласува дека при разгледување на прекин на доењето треба да се измери користа од продолжувањето на доењето во однос на ризикот поврзан со конкретната здравствена состојба или терапија.

Затоа, самото земање лек не значи дека мајката мора да се откаже од доењето. Најважно е да се знае кој лек се зема, во која доза и поради која причина, а одлуката да се донесе со стручно лице.