Десетици дипломати демонстративно ја напуштија салата на Генералното собрание на Обединетите нации во Њујорк во моментот кога израелскиот премиер Бенјамин Нетанјаху се качи на говорницата за да го одржи своето обраќање. Потегот уследи по претходен повик од палестинската делегација за бојкот на неговиот говор. Додека претседавачот повикуваше на ред поради свирежи и негодувања, Нетанјаху од говорницата упати остри пораки до дипломатите што излегоа и ги нарече „морални кукавици“.

Напуштањето на салата започна штом беше најавено обраќањето на Нетанјаху. Десетици претставници на земји-членки станаа од своите места и се упатија кон излезите, оставајќи голем број празни столчиња во главната сала.

Паралелно со бојкотот внатре, пред седиштето на ОН во Њујорк се одржаа протести против израелскиот лидер.

Room empties out at the UN as Netanyahu begins his speech. pic.twitter.com/plGg9wDRQ7

— Acyn (@Acyn) September 24, 2026

Палестинската мисија претходно испрати официјален допис до другите делегации со повик да не присуствуваат на обраќањето. Додека траеше излегувањето, во салата се слушнаа гласни свирежи, а придружбата на израелскиот премиер стана и му аплаудираше.

Нетанјаху веднаш реагираше на празнењето на салата.

„Ако во оваа сала има уште морални кукавици кои не излегоа, ве молам направете го тоа сега“, рече тој од говорницата.

Во продолжение на говорот, израелскиот премиер изјави дека неговата земја веќе три години води војна на седум фронта, но посочи дека постои и „осмо боиште“. Според него, тоа е битката за вистината што се води во светските медиуми и на социјалните мрежи.

Тој упати критики до странски држави за ширење лаги, ги нарече Израелските одбранбени сили „најморална војска на светот“ и упати посебна благодарност за поддршката до поранешниот американски претседател Доналд Трамп.