Пестицидот ланате, односно метомил, е забранет за употреба и продажба во Македонија, но случаи на труење животни покажуваат дека оваа опасна супстанца и понатаму нелегално се користи на јавни површини, пишива Pets.mk.
Случајот во населбата Расадник во Кисела Вода, каде според пријавите угинале две домашни миленичиња, две улични кучиња и неколку мачки, повторно го отвори прашањето за нелегалното расфрлање отрови по улиците. Особено загрижува употребата на ланате, високо токсичен пестицид кој може да биде опасен не само за животните, туку и за луѓето, децата и животната средина.
До истиот влез каде што се случи труењето има детска продавница. И детско игралиште. Отровот ланате, забранет за продажба во земјава, е токсичен само и доколку се вдише. Еден грам убива човек од 70 килограми.
Ланате е комерцијално име за метомил, карбаматен инсектицид што во минатото се користел во земјоделството. Поради високата токсичност и честите злоупотреби, тој е забранет или строго ограничен во голем број држави. Во Македонија, метомилот повеќе од една деценија не е дозволен за употреба и продажба, нема официјален увоз и не смее да се продава во земјоделски аптеки.
Европската Унија не ја обнови дозволата за метомил уште во 2010 година, што практично значи забрана во земјите членки. Причините се ризикот за луѓето, животните, птиците, пчелите и животната средина, како и неговата злоупотреба за труење животни.
Иако е забранет, метомилот и понатаму се појавува преку стари резерви, нелегална продажба или шверц. Токму затоа, ваквите случаи не треба да се третираат само како труење животни, туку и како сериозна закана за јавното здравје и еколошката безбедност.
Кај животните, труењето може да предизвика брза и тешка реакција: слабост, грчеви, пена од уста, отежнато дишење, губење контрола и животозагрозувачка состојба. Метомилот е опасен при голтање, вдишување и контакт со кожа, а дури и мала количина може да биде фатална за животни.
Особено опасно е тоа што отровот најчесто се остава во храна или на јавни површини, без никаква контрола кој ќе дојде во контакт со него. Така може да настрадаат домашни миленици, улични животни, птици, но и деца и возрасни лица.
Доколку граѓаните забележат сомнителна храна, прав или материја на јавна површина, не треба да ја допираат со голи раце и треба веднаш да ги оддалечат децата и животните. Случајот треба веднаш да се пријави во МВР и во Агенцијата за храна и ветеринарство.
Ако миленик дојде во контакт со сомнителна материја или покаже симптоми на труење, потребна е итна ветеринарна помош. Во вакви случаи времето е клучно и не треба да се чека симптомите сами да поминат.
Труењето со метомил претставува сериозен ризик за јавната безбедност. Одговорноста не е само на институциите, туку и на граѓаните: секој сомнеж за лице што користи или расфрла ваков отров треба да се пријави. Со тоа се штитат луѓето, животните и животната средина.
Извор: pets.mk
