Француските власти ставија во изолација повеќе од 1.700 патници на крузерот „Ambition“, кој се наоѓал во пристаништето Бордо, откако еден патник починал, а десетици други пријавиле симптоми на акутна дигестивна инфекција. Според локалните здравствени служби, околу 50 патници развиле симптоми типични за гастроентеритис, по што веднаш биле изолирани во своите кабини и ставени под медицински надзор.
„Според информациите од капетанот, до околу 50 патници имаат симптоми на акутна дигестивна инфекција“, соопштија здравствените власти во регионот Нова Аквитанија.
Бродот „Ambition“, кој припаѓа на компанијата Ambassador Cruise Line, тргнал од северот на Шкотска, а претходно застанал во Белфаст и Ливерпул, пред да пристигне во Франција, од каде требало да продолжи кон Шпанија. Како превентивна мерка, локалните власти го прекинале слегувањето на патниците и го ограничиле движењето на бродот, додека медицински тимови земаат примероци и спроведуваат анализа.
Од регионалната здравствена агенција нагласуваат дека на бродот е испратен специјален тим од Универзитетската болница во Бордо за проценка на ситуацијата. Истовремено, властите експлицитно соопштија дека нема поврзаност со неодамнешните случаи на хантавирус во Европа, со цел да се спречи паника и погрешни споредби.
Првичните тестови го исклучиле норовирусот како причина, но дополнителни анализи сè уште се во тек, додека како можен извор не е исклучено ниту труење со храна. Симптомите најсилно се појавиле во понеделник, додека бродот бил закотвен во Брест.
Иако ваквите епидемии на крузери се релативно ретки, експертите предупредуваат дека затворени простори, заедничка храна и близок контакт меѓу патниците создаваат идеални услови за ширење на гастроинтестинални инфекции. Според податоци од американскиот Vessel Sanitation Program, во 2026 година веќе се регистрирани неколку слични епидемии, најчесто поврзани со норовирус или E.coli бактерии.
Здравствените експерти дополнително предупредуваат дека шведски маси, заеднички прибор и често допирање на површини значително го зголемуваат ризикот од пренос на вакви инфекции.
