Бел тартуф со тежина од 850 грама достигна цена од 100.000 евра на меѓународната аукција во градот Алба, во италијанскиот регион Пиемонт. Ретката гастрономска подземна габа замина кај купувач од Хонгконг. На 27-то издание на ова наддавање, вкупната вредност на продадените примероци надмина половина милион евра, потврдувајќи го статусот на белиот тартуф како една од најскапите природни намирници во светот.

Настанот во Алба традиционално привлекува меѓународни колекционери, шефови на кујни и претставници на високата гастрономија. Годинава понуди пристигнуваа од Виена, Бангкок, Лондон, Бразилија и Макао.

Покрај главниот примерок, локален претприемач плати 14.000 евра за бел тартуф тежок 300 грама. Со тоа вкупниот промет на овогодишната аукција се искачи на 545.800 евра, што според италијанската новинска агенција Анса претставува втор највисок финансиски резултат во историјата на настанот.

Белиот тартуф (Tuber magnatum pico) расте исклучиво под земја, во симбиоза со корењата на специфични шумски дрвја како даб, топола и леска. За разлика од црниот тартуф, вештачкото одгледување на белиот вид досега не дава резултати на пазарот. Поради тоа, секој пронајден примерок зависи исклучиво од временските прилики во шумите.

„Оваа година тартуфите претрпеа одредени штети поради сушата. Но благодарение на неодамнешните дождови, сезоната сега очигледно се подобрува и се надеваме дека остатокот од годината ќе биде подобар“, изјави за агенцијата АФП Роберто Бодрито, регионален претседател на здружението кое ја организира аукцијата.