Собранието на Косово ја избра Јустина Широка-Пуља за претседателка на Косово, откако 81 пратеник гласаше „за“ нејзината кандидатура. Широка-Пуља, која досега беше претседателка на Академијата на науките и уметностите во Приштина, беше предложена од движењето „Самоопределување“ (Ветевендосје).

Гласањето започна само неколку минути пред полноќ, непосредно пред истекот на уставниот рок за избор на претседател, а заврши неколку минути по полноќ. Еден пратеник гласаше за Елиза Хоџа, кандидатка на Демократската партија на Косово (ПДК), додека двајца пратеници беа воздржани.

Изборот уследи по политички договор меѓу најголемите албански партии. Претходно, Собранието во второ читање ги усвои предложените измени на Законот за Специјализираните комори, што беше услов на ПДК за да го поддржи изборот на претседател.

По усвојувањето на законските измени, поддржувачите на ОВК го прекинаа протестот што се одржуваше во центарот на Приштина по изрекувањето на пресудата против лидерите на поранешната ОВК во Хаг за воени злосторства.

Седницата на Собранието се одржа откако лидерот на ПДК, Бедри Хамза, го прифати предлогот на премиерот Албин Курти Јустина Широка-Пуља да биде кандидатка за претседателка. На седницата присуствуваа пратеници од сите албански партии.

Која е Јустина Широка-Пуља?

Јустина Широка-Пуља е економистка и универзитетска професорка. Дипломирала на Економскиот факултет во Приштина, а постдипломските студии ги завршила на Економскиот факултет во Загреб.

Докторирала на Економскиот факултет во Приштина, каде што работела и како професорка. Пред да застане на чело на Академијата на науките и уметностите во Приштина, имала и политичка кариера.

Од 2008 до 2011 година била министерка за енергетика и рударство во владата на привремените институции на Косово. Од 2011 до 2014 година била пратеничка во Собранието, како претставничка на Демократската партија на Косово.

Нејзиниот избор доаѓа во последен момент, бидејќи крајниот рок за избор на претседател беше 6 октомври. Доколку Собранието не успееше да избере претседател во предвидениот рок, процесот ќе одеше кон нови избори за Собранието на привремените институции.

Со изборот на Широка-Пуља, Косово го избегна сценариото на нови парламентарни избори и доби претседателка по гласање што се одвиваше во последните часови од уставниот рок.