Контроверзиите околу четвртфиналниот натпревар меѓу Англија и Норвешка на Светското првенство 2026 не стивнуваат. Откако Англија победи со 2:1 по продолженија и се пласираше во полуфиналето, спорните судиски одлуки останаа главна тема во фудбалската јавност.
Најголемата дилема е поврзана со израмнувачкиот погодок на Џуд Белингем во судиското продолжение од првото полувреме. Норвешките фудбалери веднаш протестираа, тврдејќи дека топката претходно го допрела кабелот што ја држи камерата над теренот, поради што ја променила траекторијата.
Голманот на Норвешка, Орјан Ниланд, веднаш по погодокот реагираше кај главниот судија Клеман Тирпан, покажувајќи кон кабелот над теренот.
На телевизиските снимки се гледа дека топката по неговото исфрлање се движи по необична траекторија, што предизвика сомнежи дека можеби навистина дошло до контакт со кабелот. Според правилата на играта, доколку топката во текот на играта допре надворешен предмет, натпреварот треба веднаш да биде прекинат и играта да продолжи со судиско потфрлање.
ФИФА: Нема докази за контакт со кабелот
По бројните реакции, ФИФА објави снимка од системот за следење на топката и податоци од вградениот сензор. Според светската куќа на фудбалот, сензорот не регистрирал никаква промена во движењето на топката.
„Пред англискиот гол во 45+2. минута против Норвешка, сензорот во топката не забележал никаква промена во нејзините параметри додека беше во воздух, па затоа нема докази дека топката го допрела кабелот над теренот и поради тоа ја променила својата траекторија“, соопшти ФИФА.
Уште една спорна одлука
Натпреварот не го одбележа само овој момент. Во второто полувреме на Норвешка ѝ беше поништен погодок за 2:1 на Торбјорн Хегем поради прекршок во напад, применувајќи ново правило воведено специјално за Светското првенство 2026. Токму овие две одлуки предизвикаа бројни реакции кај норвешката јавност, додека дел од британските медиуми оценија дека четвртфиналето ќе остане запаметено повеќе по судиските контроверзии отколку по самиот фудбал.
Со победата, Англија обезбеди место во полуфиналето, каде ќе се сретне со Аргентина.
