Програмата на концертот обединува различни стилски епохи, од барокот до романтизмот, преку дела на Јохан Себастијан Бах, Франц Шуберт, Винченцо Белини и Едвард Григ, со посебен акцент на премиерната изведба на „Две симфониски пиеси“ од Григ.
Јасна Аврамовска потекнува од познато музичко семејство и своето пијанистичко образование го развива во Скопје и Софија. Средното музичко училиште ДМБУЦ „Илија Николовски – Луј“ го посетува во класата на проф. Снежана Анастасова-Чадиковска. На Факултетот за музичка уметност во Скопје студира пијано кај проф. Стела Слејанска, а студиите ги продолжува и завршува во класата на проф. Тодор Светиев со највисока оцена. Магистрира на Националната музичка академија „Панчо Владигеров“ во Бугарија, во класата на еминентната пијанистка и педагог проф. Жени Захариева.
Од 1993 година работи во ДМБУЦ „Илија Николовски – Луј“ како корепетитор и професор по пијано, а соработува и со ФМУ како музички соработник. Како пијанистка настапува со бројни домашни и странски уметници – меѓу нив Рахилка Бурзевска, Томислав Димов, Никола Атанасов, Марко Јосифовски, Славица Галич, Весна Гиновска, Татјана Петрушевска, Благој Ангеловски, Валери Стефановски, Васо Ристов, Александар Кузмановски, Дарко Мариновски и Славица Мицовска. Како солистка и ансамбловски партнер настапува со Македонската филхармонија, Камерниот оркестар на МРТВ, оркестарот на Операта при Македонскиот народен театар, хорот „Кочо Рацин“ и Камерното студио „Бахус“, под диригентство на Пламен Ѓуров, Милан Начев, Запро Запров, Ангел Шурев, Сашо Николовски-Ѓумар, Перо Петровски, Симеон Симеонов и Ле Фи Фи.
Нејзината концертна биографија ги вклучува фестивалите „Охридско лето“, „Скопско лето“, „Штипско лето“, „Денови на македонска музика“, фестивалот ЕПТА, „Il Tempietto“ во Рим, „Уметности за Земјата“ во Софија, „Музички балкански форум“ на УНЕСКО во Грција, „Музичка трибина“ во Белград и хорските свечености во Ниш и Крагуевац. Настапувала и на Крит, во рамките на Полско-македонското здружение „Висла“, како и на лауреатски концерти во Приштина. За МРТ има реализирано повеќе аудио и видео снимки, меѓу кои и ЦД-проекти со Татјана Петрушевска, Емилија Аврамовска, Љупчо Коскаров, Рахилка Бурзевска и Васо Ристов. Од 2003 година со Славица Мицовска развива пијано-дуо под менторство на проф. Жени Захариева, а во поновиот период настапува и во дуо со Дарко Мариновски. Нејзиниот професионален профил се оформува во постојаното менување на улогите – солист, камерен музичар, корепетитор и педагог – при што широката соработничка мрежа и интернационалното искуство остануваат главни обележја на нејзината работа.
Дарко Мариновски (Скопје, 1974) основното и средното музичко образование ги завршува во МБУЦ „Илија Николовски – Луј“ во Скопје. Дипломира на Факултетот за музичка уметност во 1997 година во класата на проф. Борис Романов, а магистерските студии ги завршува во 2000 година под менторство на проф. Јасминка Чакар. Уште за време на студиите настапува на бројни концерти во Македонија, меѓу кои на „Скопско лето“ и „Охридско лето“, како и на концерти во Бугарија. Истовремено го проширува интересот кон композицијата, посетувајќи работилници и часови по модална хармонија кај проф. Илија Пејовски и проф. Томислав Зографски.
По дипломирањето и до летото 2013 година работи како професор по пијано и корепетиција во МБУЦ „Илија Николовски – Луј“, каде неговите ученици освојуваат награди на државни и меѓународни натпревари. Од јануари 2009 до 2019 година е декан на Факултетот за применета музика при Универзитетот за аудиовизуелни уметности ЕСРА – Париз–Скопје–Њујорк, каде предава композиција на филмска и театарска музика, пијано, модална хармонија и музички стилови. Во април 2016 година е избран во звање редовен професор. Неговите студенти по филмска музика бележат резултати на манифестации и меѓународни работилници и фестивали во Босна и Херцеговина, Бугарија, Хрватска, САД и други земји.
Мариновски е активен и како аранжер и пијано соработник. Автор е на оркестарските аранжмани на пет македонски родољубиви народни песни, премиерно изведени на 24 декември 2015 година на гала-концертот по повод 30 години од кариерата на Борис Трајанов, под диригентство на Ѓорѓе Павловиќ. Од септември 2013 година работи и на Музичката академија при УГД – Штип како пијано соработник со студентите од класата на проф. Борис Трајанов и во оперското студио. Во неговата биографија се вбројуваат и авторска музика за филм и театар, како и камерни и концертни настапи во Македонија и странство.
Во рецензија за концертот со трубачот Љупчо Коскаров на „Златна лира“ во 2023 година, Викица Костоска Пенева забележува дека Мариновски ја обликувал густата пијанистичка фактура и романтичарскиот хармонски јазик на обработките, давајќи му на настапот шарм и допадливост, но регистрира и повремено пренагласени патетични изблици. Овој критички, нијансиран увид е важен токму затоа што го покажува неговиот пристап како пијанист и аранжер – со изразена склоност кон полна фактура, колорит и драматуршки обликуван музички тек.
Влезот е слободен.
