Повеќето возрасни лица не треба да внесуваат повеќе од 2.300 милиграми натриум дневно, што одговара на околу една лажичка сол. Сепак, голем дел од луѓето ја надминуваат оваа препорачана количина, најчесто без да бидат свесни за тоа, бидејќи најголемиот дел од натриумот не доаѓа од солта што ја додаваме во храната, туку од преработените производи и готовите оброци.

Натриумот е минерал кој има важна улога во работата на мускулите и нервниот систем, како и во одржувањето на рамнотежата на течностите и нормалниот крвен притисок. Но, неговиот прекумерен внес предизвикува задржување течности, што може да доведе до покачен крвен притисок и да го зголеми ризикот од срцеви заболувања, мозочен удар и оштетување на бубрезите.

Експертите посочуваат дека околу 70 проценти од натриумот во секојдневната исхрана потекнува од преработена храна, како конзервирани производи, сувомесни производи, сирења, пици, готови супи и брза храна. Поради тоа, подготовката на оброците дома со свежи намирници е еден од најефикасните начини за намалување на внесот на сол.

Иако постојат научни дебати околу многу нискиот внес на натриум, водечките здравствени организации и понатаму препорачуваат умерена консумација. За лицата со висок крвен притисок, дијабетес или хронични заболувања на бубрезите, ограничувањето на внесот на сол е особено важно и треба да биде дел од препораките на лекар.