Редовното туширање е навика што повеќето луѓе ја сметаат за неопходна, исто како миењето заби. Но, дерматолозите предупредуваат дека многумина грешат: некои се тушираат предолго и со премногу жешка вода, а други премногу ретко, што може да доведе до проблеми со кожата.
Според дерматолозите, најдобрата мера е некаде на средина — доволно често за да се одржува хигиена, но не толку агресивно што кожата ќе стане сува, иритирана и оштетена.
За повеќето возрасни лица, секојдневното туширање е во ред. Но, кај некои луѓе доволно е и туширање секој втор ден, во зависност од типот на кожа, начинот на живот, физичката активност и средината во која живеат или работат.
Дерматологот Брендан Кемп од Њујорк објаснува дека луѓето кои повеќе се потат, вежбаат секој ден или работат во услови каде што се изложени на нечистотија, треба почесто да се тушираат. Од друга страна, лицата со сува или чувствителна кожа можеби подобро ќе реагираат на поретко туширање.
Дерматологот Ксенија Кобец додава дека возраста исто така има важна улога. Кај помладите, кожата обично произведува повеќе себум и подобро ја задржува природната влажност, па секојдневното туширање најчесто не претставува проблем. Но, по 40-тата и 50-тата година кожата станува посува и почувствителна, па секојдневното туширање може да биде премногу агресивно.
Особено внимателни треба да бидат луѓето со хронични кожни состојби, како екцем или многу сува кожа. Секој контакт со вода може да го зголеми губењето на влага од кожата, што дополнително ја влошува сувоста и иритацијата.
Пречестото туширање може да ја наруши природната заштитна бариера на кожата, особено ако се користи врела вода, агресивни сапуни или ако туширањето трае предолго. Ако некој мора да се тушира повеќе пати дневно, дерматолозите советуваат само едно туширање да биде темелно, а останатите да бидат кратко испирање.
Но, и предолгото одложување на туширањето носи ризици. Наталожениот зној, бактерии и нечистотија може да предизвикаат непријатен мирис, иритации, акни на телото, воспаление на фоликулите, па дури и габични инфекции во делови како пазувите и препоните.
По тренинг, ако сте многу испотени, најдобро е барем брзо да се истуширате. Ако знојот остане со часови на кожата, може да предизвика иритација и појава на акни. Ако немате време за целосно туширање, дерматолозите советуваат да се измијат барем деловите што најмногу се потат — градите, грбот, пазувите и препоните.
Клучот, велат експертите, е во рамнотежата. Претераното туширање може да ја исуши и оштети кожата, додека недоволната хигиена може да доведе до затнати пори, иритации и инфекции.
