Најмалку 40 лица починаа, а повеќе од 3.000 се заразени со колера во сојузната држава Борно на североистокот на Нигерија во текот на мај 2026 година. Властите потврдија дека епидемијата брзо се шири низ 139 заедници, предизвикувајќи една од најтешките јавноздравствени кризи во овој регион во последните години.
Преоптоварени болници и пациенти на подот
Здравствениот систем во погодените подрачја, особено во градовите Маидугури и Џере, се наоѓа пред целосен колапс поради драстичниот скок на нови случаи. Во центрите за лекување десетици пациенти истовремено примаат терапија, а поради пренатрупаност и недостиг на болнички кревети, дел од нив се принудени да лежат на подот. Здравствените работници од терен алармираат дека во само еден ден се регистрираат повеќе од 100 нови инфекции, што го прави менаџирањето на кризата речиси невозможно со моменталните капацитети.
Жените и децата се најголеми жртви
Како и во секоја хуманитарна и здравствена криза, системската негрижа и недостигот на ресурси најсилно ги погодуваат маргинализираните групи. Меѓу инфицираните во Нигерија, огромен процент се жени и деца. Локалните жители сведочат за брзината со која се развива болеста, каде симптомите како повраќање и дијареја за кратко време завршуваат фатално поради дехидратација, пред семејствата воопшто да успеат да стигнат до медицинска помош. Дополнителен проблем е што дел од населението стравува или избегнува да оди во здравствените установи поради стигма или недоверба во системот.
Сиромаштијата и нечистата вода како извор на заразата
Официјалните претставници и здравствените експерти јасно ја лоцираат вината за оваа катастрофа: неисправни извори на вода за пиење, катастрофални санитарни услови и пренаселеност. Кризата е најизразена во камповите за внатрешно раселени лица, каде луѓето живеат во супстандардни услови без пристап до основни хигиенски средства. Иако властите започнаа да делат таблети хлор и средства за дезинфекција, оваа епидемија е уште еден суров потсетник дека пристапот до чиста вода е фундаментално човеково право, а не луксуз.
