Европската јавност е потресена по откривањето дека во бебешка храна на компанијата HiPP е пронајден отров за глодари. Случајот веднаш предизвика паника и масовни повлекувања на производи од рафтовите во неколку земји. Според првичните информации, не станува збор за производствена грешка, туку за намерна манипулација поврзана со обид за уцена.
Уцена од милиони евра
Австриските власти наведуваат дека компанијата добила заканувачки е-маил во кој непознато лице барало 2 милиони евра. Во пораката се тврдело дека во продавници во Чешка, Словачка и австрискиот регион Бургенланд ќе биде ставена контаминирана бебешка храна доколку не се плати сумата.
Компанијата го забележала мејлот со задоцнување, по што веднаш започнала истрага во соработка со надлежните институции.
По откривањето на сомнежите, производите се превентивно повлечени од околу 1.500 продавници. Властите реагирале брзо за да спречат потенцијален ризик по здравјето на бебињата. Истрагата опфаќа повеќе европски земји, а се проверува дали контаминираните производи стигнале и во други пазари.
Ситуацијата не ги засега сите пазари подеднакво
Компанијата потврди дека спорните производи не се увезуваат и не се продаваат во Србија. Тие нагласуваат дека локалните производи се под строги контроли и дека нема ризик за потрошувачите на тоа подрачје.
HiPP соопшти дека проблемот не е поврзан со производниот процес, туку со надворешна криминална активност.
„Ова не е проблем на квалитетот, туку криминално дело кое е предмет на истрага“, наведуваат од компанијата.
Истражните органи во Чешка и Словачка работат на идентификација на лицето кое стои зад заканите. Се анализираат дигитални траги и комуникации, а се проверуваат и сите локации каде што биле дистрибуирани производите. И покрај шокот, компанијата уверува дека безбедноста на децата останува апсолутен приоритет.
Сепак, случајот отвора пошироки прашања за безбедноста во синџирите на снабдување и ризиците од намерни саботажи во прехранбената индустрија.
