Клучните економски показатели во Кина за месец јули забележаа дополнителен пад, потврдувајќи дека второто најголемо светско господарство сè потешко се справува со домашната криза. Според официјалните податоци што ги пренесе ЦНБЦ, малопродажбата речиси стагнира, индустриското производство забавува, а инвестициите во урбаните средини забележаа драстичен пад. Ваквиот развој на настаните го зголемува притисокот врз властите во Пекинг за итна интервенција и финансиски поттик на економијата во втората половина од годинава.
Најголемиот удар врз кинеската економска активност доаѓа од градежниот сектор и пазарот на недвижности, кои со години беа еден од главните мотори на растот. Во првите седум месеци од годинава, вкупните инвестиции во градовите се намалија за 6,7 отсто во споредба со истиот период лани.
Падот е најизразен токму кај недвижностите, каде што е регистрирано намалување на инвестициите од дури 19,2 отсто. Дополнително, инвестициите во инфраструктурата забележаа пад од 3,6 отсто, додека вложувањата во производствениот сектор се намалија за 1,7 отсто.
Покрај падот на инвестициите, податоците покажуваат дека и домашната потрошувачка останува на исклучително ниско ниво. Малопродажбата во јули порасна за скромни 0,6 отсто на годишно ниво, што претставува дополнително забавување во споредба со јуни, кога забележа раст од 1 отсто.
Истовремено, индустриското производство оствари раст од 4,5 отсто, што исто така е послаб резултат од претходниот месец. Негативниот тренд се одрази и врз пазарот на труд, па стапката на невработеност во градовите се зголеми од 5 на 5,2 отсто.
Националното биро за статистика на Кина соопшти дека е неопходно забрзување на транзицијата кон нови извори на економски раст, со фокус на дополнителни реформи и поголема отвореност на пазарот. Сепак, аналитичарите укажуваат дека досегашните мерки не дадоа соодветен резултат во подигнувањето на довербата кај приватниот сектор и кај граѓаните.
Без посериозна државна поддршка за поттикнување на домашната побарувачка и решавање на долговите во секторот за недвижности, кинеското господарство ризикува подлабок период на стагнација.
