Кими Антонели стигна до нов триумф во Формула 1, откако ја освои Големата награда на Шпанија во Мадрид и ја запиша осмата победа сезонава. Возачот на Мерцедес ја искористи тактичката одлука на Ферари и Шарл Леклер, кој со старите гуми остана на патеката сè до завршницата на трката. Антонели на крајот ја презеде водечката позиција и без поголеми проблеми ја задржа до целта.
Трката започна бурно. Антонели во првата кривина се обиде да го помине Ландо Норис, но при маневарот ја пресече кривината и излезе пред возачот на Мекларен. Ситуацијата дополнително се промени по инцидентот на Ландо Строл, по што на патеката излезе безбедносното возило. Норис повторно го презеде водството, со предност од 6,2 секунди пред Антонели, додека зад нив се најдоа Макс Ферстапен, Леклер и Џорџ Расел.
Ферари ризикуваше – Леклер предолго остана на патеката
За Ферари трката доби сериозен удар уште во седмиот круг. Луис Хамилтон мораше да влезе во бокс поради проблеми со сопирачките и не успеа да ја продолжи трката. Норис водеше до 15. круг, кога стана јасно дека средно тврдите гуми не му овозможуваат доволно темпо. Тој влезе во бокс и стави тврди гуми, со што Леклер се најде на првото место, а Антонели веднаш зад него.
Во следните кругови Ферари се обиде со поинаква стратегија. Леклер ги продолжи своите стинтови и максимално ги користеше гумите, додека Антонели во еден момент намерно го намали темпото. Сепак, како што трката напредуваше, разликата повторно почна да се топи.
Во 36. круг Леклер сè уште имаше околу 2,5 секунди предност, но беше очигледно дека прашањето не е дали ќе влезе во бокс, туку кога ќе го направи тоа. Во меѓувреме, Ферстапен му се приближуваше на Антонели, а Норис го притискаше Џорџ Расел. Возачот на Мерцедес мораше во бокс, па Норис ја презеде четвртата позиција.
Последните кругови ја решија трката
Леклер остана на патеката сè до 47. круг, кога конечно влезе во бокс. Во тој момент Антонели, Ферстапен и Норис беа во непосредна близина, а Леклер по излегувањето од боксот се врати далеку зад лидерот. Антонели ја презеде првата позиција и влезе во последните кругови со контрола врз трката. Ферстапен беше втор, а Норис се обидуваше да најде начин да го нападне возачот на Ред Бул. Во последните пет круга Норис постојано му се приближуваше на Ферстапен, но не успеа да го претекне.
Антонели без поголеми проблеми ја мина целта како победник, со Ферстапен на второто и Норис на третото место. Леклер заврши четврти, Расел петти, а зад нив се пласираа Пјер Гасли, Лиам Лосон, Франко Колапинто, Оскар Пјастри и Арвид Линдблад.
Со осмата победа сезонава, Антонели дополнително ја зголеми предноста во генералниот пласман. Возачот на Мерцедес сега има 292 бода, Џорџ Расел е втор со 211, Луис Хамилтон има 191, а Ландо Норис е на 185 бода.
