Комисијата за заштита на конкуренцијата досега оформила околу 45 предмети за непочитување на Законот за нефер трговски практики, а изречените казни изнесуваат околу 200.000 евра.

Според заменик-министерот за економија и труд Марјан Ристески, практиката покажала дека законот треба дополнително да се доуреди, особено во делот на договорите меѓу трговците и добавувачите.

Најголемата промена, сепак, се очекува во казнената политика. Казните кои сега изнесуваат најмногу до 20.000 евра, со измените што се најавуваат до крајот на летото, треба да бидат зголемени десетпати.

Поголеми казни за изигрување на законот

Најавените измени се насочени кон трговците и добавувачите кои не ги почитуваат правилата и преку договорни услови или други практики го префрлаат товарот врз производителите, добавувачите и на крајот врз граѓаните.

Законот за нефер трговски практики беше донесен за да се ограничи злоупотребата на пазарната позиција во синџирот на снабдување, особено кај земјоделските и прехранбените производи.

Со новите измени треба да се намали просторот за заобиколување на правилата и да се зајакне надзорот врз начинот на кој се склучуваат и спроведуваат договорите меѓу трговците и добавувачите.

Околу 45 предмети досега

Досегашната примена на законот покажува дека институциите веќе постапувале по повеќе случаи. Според објавените информации, Комисијата за заштита на конкуренцијата оформила околу 45 предмети, а досега се изречени казни во вкупен износ од околу 200.000 евра.

Со најавеното зголемување, казната за еден прекршок во иднина би можела да достигне колку што досега изнесувала вкупната сума на изречени казни.

Се најавуваат и мерки за вработување млади

Покрај измените во Законот за нефер трговски практики, беше најавен и нов годишен оперативен план за вработување, кој треба да почне да функционира од следниот месец.

Планот е наменет за невработени лица, лица од социјално загрозени категории и млади до 29 години. Според најавите, мерките треба да бидат поефективни и подостапни, а ќе опфатат и можност за вработување на иселеници кои сакаат да се вратат и да работат во земјава.

Минатогодишниот оперативен план, според Министерството за економија и труд, бил реализиран со 92 проценти. Во 2025 година мерките ги користеле околу 12.000 лица, а најбарана била мерката за самовработување, преку која повеќе од 2.600 лица отвориле сопствен бизнис.