Бесплатниот концерт на Филхармонијата ќе ја затвори сезоната „Без филтер“ и ќе донесе голема регионална музичка соработка меѓу Скопје, Софија и Солун.

Оркестарот на Филхармонијата вечерва во 21 часот во Градскиот парк во Скопје ќе ја изведе музичко-сценската кантата „Кармина Бурана“ од Карл Орф. Настанот ќе биде свечена завршница на концертната сезона „Без филтер“ и ќе се одржи како голем концерт на отворено, достапен за сите граѓани.

Во проектот ќе настапат повеќе од 200 музичари. Покрај оркестарот на Филхармонијата, ќе учествуваат и музичари од Софиската филхармонија, Државниот симфониски оркестар од Солун, хорот на Македонската опера и балет, детскиот хор „Пиколо“ и хорот од Музичкото училиште од Солун.

Диригент на концертот е маестро Најден Тодоров од Бугарија, кој е и иницијатор на проектот. „Кармина Бурана“ претходно била изведена во Софија и Солун, а вечерва регионалната музичка приказна продолжува во Скопје.

Како солисти ќе настапат сопранистката Ана Дурловски, тенорот Николас Спанос од Грција и Иво Јорданов од Бугарија.

Сопранистката Дурловски оцени дека проектот е пример за културна дипломатија и доказ дека музиката може да ги надмине границите и да создаде чувство на заедништво меѓу народите. Концертмајсторот Владимир Костов, пак, нагласи дека музиката е универзален јазик кој ги руши бариерите и ги поврзува луѓето од различни земји.

Директорот на Филхармонијата, Мустафа Имери, истакна дека станува збор за голем музички спектакл и значајна регионална соработка, која ја покажува моќта на музиката да обединува без граници.

Министерот за култура и туризам, Зоран Љутков, посочи дека културата има најголема вредност кога излегува од институциите и станува достапна за сите. Тој нагласи дека концертот ќе биде бесплатен и подарок за граѓаните, со порака дека големата уметност треба да допре до што повеќе луѓе.

Љутков додаде дека настанот има и симболично значење, како продолжение на идејата за Балканска филхармонија.

Директорот на Државната филхармонија од Солун, Симос Папанас, истакна дека проектот има цел да гради мостови на соработка меѓу балканските земји и да покаже дека уметноста може да обединува, дури и во турбулентни времиња.

Со изведбата на „Кармина Бурана“ во Градски парк, Филхармонијата ја завршува сезоната со настан што ја носи класичната музика надвор од концертната сала и ја претвора во заедничко културно искуство под отворено небо.