Како се менувало Скопје од стар град во современа урбана средина и што може да се научи од неговото архитектонско минато? Овие прашања се во фокусот на денешната панел-дискусија во рамките на проектот „Времеплов – првите чекори кон урбанизацијата на Скопје“, во организација на Српскиот културно-информативен центар „Спона“.

Проектот е поддржан од Град Скопје за 2026 година, преку програмата за поддршка на манифестации и настани од значење за градот.

Панел-дискусијата е замислена како простор за директен дијалог и размена на мислења меѓу експертите, студентите и граѓаните. Темите ќе ги опфатат урбаната историја на Скопје, зачувувањето на архитектонските објекти и предизвиците пред современиот урбанизам.

„Спона“ најавува дека целта е да се поттикне поширока јавна вклученост во разговорот за развојот на градот и за значењето на неговото архитектонско наследство.

Документарна изложба за трансформацијата на Скопје

Покрај дискусијата, посетителите ќе можат да ја разгледаат и документарната изложба, преку која визуелно ќе се запознаат со изгледот на старо Скопје и неговата трансформација низ времето. „Времеплов – првите чекори кон урбанизацијата на Скопје“ треба да овозможи поглед кон историските процеси што го обликувале градот и кон урбаните траги што се препознаваат и во денешното секојдневие.

Изложбата беше отворена завчера во Домот на културата „Кочо Рацин“, во организација на Српскиот културно-информативен центар „Спона“. Преку изложбата и панел-дискусијата, проектот го отвора прашањето како подобро да се разбере минатото на Скопје и како тоа знаење може да придонесе за размислувањата за неговиот иден развој.