Најмладата избрана градоначалничка во Јапонија, 35-годишната Шоко Кавата, повторно влезе во историјата. Таа објави дека ќе користи породилно отсуство поради раѓањето на своето прво дете, отворајќи широка јавна дебата за положбата на жените во јапонската политика и работниот систем.

Кавата, која е градоначалничка на градот Јавата од 2023 година, треба да се породи во септември. Таа планира да користи вкупно 16 недели породилно отсуство, осум недели пред и осум по породувањето. Ова се смета за прв ваков случај меѓу актуелните градоначалници во Јапонија.

Иако вработените во јавниот сектор имаат законско право на породилно отсуство, за избраните функционери не постои јасно дефинирана правна рамка. Според Кавата, нејзината одлука може да биде поттик за промени во системот и подобрување на рамнотежата меѓу професионалниот и приватниот живот.

За време на нејзиното отсуство, управувањето со градот од околу 70.000 жители ќе го преземе заменик-градоначалникот. Сепак, Кавата најави дека ќе остане достапна и повремено ќе ја следи службената комуникација.

Нејзината одлука предизвика поделени реакции на социјалните мрежи. Дел од корисниците сметаат дека јавните функционери не треба да отсуствуваат од работа, додека други ја поддржаа и ја оценија како позитивен пример за идните генерации жени во политиката.

Експертите посочуваат дека јапонското општество и натаму се соочува со застарени ставови кога станува збор за улогата на жените на работното место. И покрај постепениот напредок, жените сè уште се недоволно застапени во политиката и на раководните позиции.

Темата добива дополнителна важност во период кога Јапонија се соочува со сериозна демографска криза. Во 2025 година земјата забележала рекордно низок број новородени, продолжувајќи го повеќегодишниот тренд на опаѓање на наталитетот. Експертите предупредуваат дека долгото работно време, високите животни трошоци и тешкотиите во усогласувањето на кариерата и семејството се меѓу главните причини за ваквата состојба.

Кавата смета дека жените не треба да бидат принудени да избираат меѓу мајчинството и професионалниот развој. Според неа, постепените промени можат да доведат до порамноправно општество во кое родителството нема да претставува пречка за успешна кариера.