Израелските одбранбени сили (ИДФ) им наредија на жителите на десет градови и села во јужен Либан итно да ги напуштат своите домови, наведувајќи дека постои зголемен ризик поради активности на Хезболах, поддржан од Иран.

Портпаролот на ИДФ за арапски јазик, Авихај Адрае, преку објава на социјалната мрежа X ги повика жителите да се евакуираат од населените места Машгара, Деир ал Зехани, Ал Шаркија, Ал Дувер, Клајлех, Сахмер, Зибдин, Долна Набатија, Араб Салим и Кафр Јоз.

„Мора веднаш да ги напуштите своите домови и да се оддалечите најмалку 1000 метри кон отворени подрачја“, се наведува во пораката. Во истото предупредување се додава дека секој што се наоѓа во близина на припадници на Хезболах или нивна инфраструктура го ризикува сопствениот живот.

Напнатости и покрај примирјето

Иако формално сè уште важи прекин на огнот меѓу Израел и Хезболах, на терен продолжуваат ограничени прекугранични напади и инциденти, при што најголем дел од жртвите се регистрирани на либанска страна. Во поширокиот регионални контекст, се споменува и дека Иран, како главен поддржувач на Хезболах, инсистира на поширок договор за стабилизација на конфликтите, кој би ги опфатил и судирите во Либан. Во меѓувреме, аналитичарите предупредуваат дека ваквите евакуациски наредби укажуваат на можна понатамошна ескалација на состојбата долж границата меѓу Израел и Либан.