Изложбата на фотографии насловена „Траги и растојанија“ на Иван Блажев ќе биде отворена во четврток, на 10 септември во 20 часот, во просторот на Факултетот за ликовни уметности во Сули ан. Поставката опфаќа педесетина дела снимени во период од 18 години, каде фокусот е ставен врз личната меморија, созревањето и прекршувањето на реалните настани низ сеќавањата.

Проектот произлегува од долгогодишен процес на истражување и селекција. Изложените дела се создавани меѓу 2006 и 2024 година. Наместо линеарен преглед на времето, Блажев избира структура ослободена од датуми и имиња.

Кадрите бележат лица, простори, предмети и минливи ситуации. Тие функционираат како поединечни фрагменти што градат емотивни релации, наместо строга биографска приказна.

Јадрото на материјалот го сочинуваат фотографии што го документираат патот на ќерката на авторот, од нејзиното рано детство до созревањето. Овие приватни моменти се испреплетени со сцени од различни локации и периоди.

Авторот не ја гради изложбата како класичен семеен албум. Вниманието е насочено кон просторот меѓу реалниот настан и начинот на кој умот го зачувува. Физичкиот настан избледува, но останува внатрешното доживување на моментот.