Уметникот Иван Аџиевски ја подготвува својата седма самостојна изложба насловена „Згужвана Меморија“, мултимедијален проект составен од серија слики во техника масло на платно и интерактивна просторна инсталација. Поставката ја истражува природата на сеќавањето како динамичен и слоевит процес подложен на постојани трансформации под влијание на времето и емоциите. Наместо класична нарација, делата користат апстрактни структури и тактилност преку кои публиката добива директна улога физички да го запише и превитка сопственото искуство.
Визуелниот концепт на сликите се потпира врз апстрактни структури што наликуваат на згужвана површина. Оваа естетика служи како директна метафора за меморијата како содржина што не исчезнува од свеста, туку се преклопува, менува и одново се артикулира низ годините.
Во делата формата и материјалноста се основните елементи за пренос на пораката. Колоритот се движи од пригушени монохроматски нијанси до силни визуелни контрасти, поставени како емотивни и психолошки одредници за отворање простор за лична интроспекција на набљудувачот. Несовршеноста и промената на обликот тука се третираат како нераскинлив дел од природата на сеќавањето.
Проектот го проширува сликарскиот јазик од рамката на платното во галерискиот простор преку посебна инсталација. Посетителите немаат само улога на пасивни набљудувачи, туку активно учествуваат во перцепцијата на делото.
Инсталацијата му овозможува на секој гледач да впише сопствено сеќавање, а потоа по желба и физички да го згужва. Преку овој чин меморијата се материјализира како релациски феномен што се активира исклучиво низ присуство, физичко движење и директен контакт со материјалот.
Иван Аџиевски, роден во Скопје во 1985 година, дипломирал на Правниот факултет при Универзитетот „Св. Кирил и Методиј“ во 2009 година, по што во 2018 година влегува на ликовната сцена со дебитантската изложба „BEAUTY SPOT“ во галеријата „Концепт 37“.
Неговиот опус минува низ повеќе фази. По експресионистичките и кубистички портрети и женски акти во циклусите „BEAUTY SPOT II“ (КСП „Центар Јадро“, 2022) и „Beauty Spot III“ (Центар за современи уметности, 2025), Аџиевски развива силна општествено ангажирана линија. Во 2023 година ја реализира мултимедијалната поставка „ФОРМИ НА СИСТЕМОТ“ насочена против корупцијата, а во 2024 година во Центарот за современи уметности изложува фиктивни монументи посветени на неродените и иселените граѓани. Пред актуелниот проект, тој се претстави со изложбата „Плацебо“, каде преку алтернативни медиуми и минимален медитативен наратив истражуваше техники за визуелно ослободување од секојдневниот стрес.
