Семејството на американскиот студент Џејмс „Вестон“ Хигинботам, кој исчезна пред повеќе од една недела во Јапонија, не се откажува од потрагата и покрај тоа што, според нив, локалните власти ја завршиле официјалната теренска акција.
Дваесетгодишниот студент на Универзитетот „Оберн“ последен пат бил виден како пеш се движи кон густо пошумено подрачје во близина на Кјото. Неговите родители сега организираат сопствена потрага со помош на локални жители и ангажиран тим за пребарување.
Вестон бил на семејно патување во Јапонија. Исчезнал додека сам го истражувал Кјото, по расправија со мајка му околу користењето вештачка интелигенција за навигација и ресурсите што таквата технологија ги троши.
„Не заминуваме од Јапонија додека не го најдеме Вестон“, изјави неговата мајка Ненси Хигинботам за CNN.
Семејството пристигнало во Јапонија на 22 мај, а пред Кјото ги посетило Токио, Нико и Такајама. Во Кјото пристигнале на 29 мај. По заеднички оброк и прошетка, Вестон одлучил сам да го разгледува градот, додека остатокот од семејството заминал во посета на храм.
Родителите ја следеле неговата локација преку апликацијата Life360 и виделе дека влегол во воз и посетил неколку продавници. Кога му испратиле порака со прашање каде оди, неговата локација наскоро била исклучена, што, според мајка му, било невообичаено за него.
Според полицијата, Вестон околу 18 часот сам ја напуштил железничката станица во Кјото. Последен пат бил снимен околу 20 часот на надзорна камера во областа Јамашина, на границата меѓу префектурите Кјото и Шига.
Станува збор за планински и густо пошумен предел, а камерата се наоѓала на пат што води кон планинарски патеки. Неговата мајка истакнува дека Вестон има искуство со активности во природа, бидејќи семејството често планинари, вози планински велосипеди и се занимава со активности на отворено.
Исчезнувањето било пријавено на 30 мај околу 2 часот по полноќ. Во следните денови семејството започнало кампања на социјалните мрежи, барајќи информации и можни траги.
Официјалната потрага почнала на 3 јуни, со десетици полицајци, хеликоптер и полициски кучиња. Потрагата била отежната од силна бура со ветер и обилен дожд.
Според семејството, 72-часовната полициска потрага низ шумата завршила на 5 јуни. Во неа учествувале повеќе од 100 полицајци, кучиња трагачи и хеликоптери. Истрагата, сепак, продолжува преку анализа на снимки од надзорни камери и проверка на активностите на неговите банкарски картички.
На 6 јуни семејството, заедно со локални жители и приватен тим, започнало сопствена потрага во шумите кај Јамашина. Фокусот е ставен на подрачје во радиус од околу осум километри од местото каде што се претпоставува дека Вестон влегол во шумата.
