Иран започна нов бран напади врз американските сојузници во Персискиот Залив, откако САД ја завршија седмата последователна ноќ на удари врз ирански воени цели. Новата ескалација доаѓа една недела по распадот на кревкиот договор за прекин на огнот. 

Според извештаите, Кувајт бил изложен на повторени ракетни и беспилотни напади. Погодена била постројка за десалинизација, а летовите на меѓународниот аеродром биле привремено прекинати поради безбедносните закани. 

Техеран тврди дека погодил американски воени објекти

Иранската револуционерна гарда соопшти дека нападнала центар за поддршка на американската војска во кампот „Арифџан“ и радарски објект во воздухопловната база „Али ал Салем“ во Кувајт.

Иранските државни медиуми објавија и дека во Бахреин биле нападнати воздухопловната база „Шеик Иса“, каде што наводно биле распоредени американски борбени авиони, како и разузнавачки центар.

Ројтерс наведува дека не можел независно да ги потврди овие тврдења. 

„Кој и да ве нападне, нападнете го на ист начин“, порача Револуционерната гарда, предупредувајќи ги сојузниците на Вашингтон во регионот дека можат да очекуваат дополнителни напади.

САД ја завршија седмата ноќ на удари

ЦЕНТКОМ соопшти дека американските сили во последната серија напади погодиле ирански локации за надзор, воена логистичка инфраструктура, подземно складиште за оружје и поморски капацитети.

Во операцијата биле употребени борбени авиони, беспилотни летала и воени бродови, а целта, според американската команда, била дополнително слабеење на воените способности на Иран. 

Иранските медиуми претходно објавија дека американските напади погодиле најмалку пет мостови на југот на земјата. Во нападите врз мостови и железничка станица во областа Бандар Хамир, според иранските извори, загинале седум лица.

Пријавени биле и напади врз аеродромот Ираншахр и кула во пристаништето Чабахар. Американската војска тврди дека кулата била користена од Револуционерната гарда за следење и напади врз бродови. 

Новата размена на удари дополнително го зголемува ризикот конфликтот да се прошири низ целиот регион и да ги загрози енергетската инфраструктура и поморскиот сообраќај во Ормускиот Теснец.