Интернет блокадата во Иран, воведена од властите, трае веќе седум недели, објави групата за мониторинг на интернет сообраќај NetBlocks. Според нивните податоци, земјата влегла во 50-тиот ден на изолација од глобалната мрежа, односно повеќе од 1.176 часа со сериозно ограничен пристап до интернет.
NetBlocks наведува дека ова е најдолгата досега регистрирана национална интернет блокада во Иран, а според нив и една од најтешките вакви рестрикции забележани во светски рамки. Организацијата претходно соопшти дека прекинот ја надминал и границата на најдолга национална блокада од овој тип, со сериозни последици врз комуникацијата, пристапот до информации и секојдневниот живот.
Според мониторингот и извештаите на медиуми што ја следат ситуацијата, рестрикциите имаат сериозно влијание врз животот и човековите права на голем дел од Иранците. Ограничени се пристапот до независни информации, комуникацијата со семејствата во странство и користењето на бројни онлајн услуги и дигитални алатки потребни за работа и секојдневно функционирање.
Блокадата е дел од пошироката контрола врз информацискиот простор во земјата, која се засили по последните безбедносни и политички тензии. Иако властите не нудат јасен рок за целосно враќање на пристапот, досегашните показатели упатуваат дека дигиталната изолација продолжува без конкретен крај на повидок.
