Пиењето две до три шолји кафе дневно е поврзано со помал ризик од анксиозност, покажува ново истражување објавено во научното списание „Џурнал оф афектив дисордерс“. Сепак, експертите предупредуваат дека поголемите количини може да предизвикаат нервоза и нарушен сон.

Истражувањето покажало дека умереното количество кафе може да има одредени позитивни ефекти врз расположението и менталната благосостојба. Според експертите, таканаречената „златна средина“ од две до три шолји дневно се совпаѓа и со општите препораки за внес на кофеин.

Надминувањето на оваа количина, особено кај луѓето чувствителни на кофеин, може да доведе до несоница, нервоза и зголемена анксиозност. Сепак, реакцијата е индивидуална, па некои луѓе може да почувствуваат несакани ефекти и по помала количина.

Интересно е што резултатите биле слични и кај различни видови кафе, вклучително и безкофеинското. Тоа укажува дека можните позитивни ефекти не се поврзани само со кофеинот, туку и со други состојки на кафето, како антиоксидансите и биоактивните соединенија.

Експертите, сепак, нагласуваат дека истражувањето е од набљудувачки карактер и не докажува дека кафето директно ја намалува анксиозноста. На менталното здравје влијаат и исхраната, спиењето, физичката активност и стресот.

Затоа, кафето не треба да се смета за лек против анксиозност или депресија. Најважно е секој човек да ја земе предвид сопствената реакција на кофеин и да не претерува со неговото консумирање.