Девет европски држави побараа од Европската комисија да ги продолжи вонредните мерки за флексибилност при примената на новиот Систем за влез и излез (Entry/Exit System – EES), предупредувајќи дека Европската Унија сè уште не е подготвена целосно да ги укине постојните олеснувања.

Во заедничко писмо испратено на 7 јули до еврокомесарот за внатрешни работи Магнус Брунер, Белгија, Франција, Германија, Грција, Италија, Малта, Холандија, Португалија и Швајцарија наведуваат дека првите месеци од примената на системот откриле „значителни потешкотии“ кои не смеат да се потценат.

Државите бараат продолжување на механизмот што им овозможува на граничните служби, во исклучителни ситуации, привремено да го прекинат собирањето отпечатоци од прсти и скенирањето на лицето на патниците за да се намалат метежите, додека истовремено продолжува евиденцијата на влезовите и излезите од Шенген-зоната.

Овој механизам треба да престане да важи на 6 септември 2026 година, а министрите бараат Европската комисија навреме да даде писмени гаранции дека неговата примена ќе биде продолжена.

Портпаролот на Европската комисија, Маркус Ламерт, изјави дека Комисијата ја поздравува посветеноста на земјите за целосно спроведување на системот EES и потсети дека постојното законодавство веќе предвидува одредена флексибилност, вклучително и можност за привремено суспендирање на собирањето биометриски податоци во периоди на голем сообраќај.

Во меѓувреме, аеродромите, авиокомпаниите и траектните превозници предупредуваат дека новиот систем веќе создава долги редици и оперативни проблеми во текот на летната туристичка сезона. Според нив, техничките и организациските предизвици тешко дека ќе бидат целосно надминати до почетокот на септември.

Засега Европската комисија не најавува продолжување на важноста на овие привремени мерки по 6 септември.