Пакистанската полиција уапси маж осомничен дека повеќе од десет години ја држел во заробеништво својата сопруга, француска државјанка, и нивните пет деца, изложувајќи ги на физичко и психичко насилство. Според информациите што ги пренесува Би-би-си, случајот бил откриен откако еден од синовите успеал да избега од семејниот дом и да побара помош од полицијата. По неговата пријава, полицајците извршиле рација во куќа во градот Бари, во покраината Хајбер Пахтунхва, каде ги пронашле мајката и петте деца во тешки услови за живот.

Жената, идентификувана како Силви Јасмина, и нејзините деца биле пронајдени во тесна и запуштена просторија, а кај дел од нив биле забележани и видливи траги од насилство. По интервенцијата на полицијата, тие биле префрлени во сигурна куќа во Пешавар, а според локалните власти, планираат да се вратат во Франција.

Педесет и четиригодишната Јасмина изјавила дека семејството било практично затворено откако во 2014 година се преселиле во Пакистан од Австралија. Според нејзините тврдења, не ѝ било дозволено да комуницира со други луѓе, а децата биле лишени од нормално образование и социјален живот. Двете најстари деца го прекинале школувањето, додека трите помали, родени во Пакистан, никогаш не биле запишани во училиште. Жената тврди дека сопругот редовно ги малтретирал и ги држел во изолација, без соодветна грижа и поддршка.

Двојката се венчала во 2003 година и живеела во Австралија до преселбата во Пакистан. Пакистанските власти засега не го објавуваат идентитетот на осомничениот, против кого е покрената истрага. Во својата изјава до полицијата, Јасмина навела дека чувствува оти нејзиниот живот и иднината на нејзините деца биле уништени од годините поминати во заробеништво и насилство.