Норвешкиот напаѓач Ерлинг Халанд не го криеше разочарувањето по елиминацијата на Норвешка од Англија во четвртфиналето на Светското првенство 2026. По поразот со 2:1 по продолженија, една од главните теми беше контроверзната ВАР-одлука со која беше поништен голот на Торбјорн Лисакаер Хегем.
Судиите проценија дека Халанд претходно направил прекршок врз Елиот Андерсон, негов иден клупски соиграч во Манчестер Сити, по што погодокот беше поништен.
„Искрено, се чувствувам празно. Мислам дека заслуживме повеќе. За мене тоа не беше прекршок. Голот беше поништен затоа што наводно сум го оттурнал Елиот Андерсон, а мене така ме оттурнуваат во секој дуел. Останува горчлив вкус“, изјави Халанд за норвешката телевизија TV2.
Норвешкиот голгетер смета дека критериумот на судиите бил недоследен.
„Ако тоа е прекршок, тогаш јас треба да добивам слободен удар во речиси секој дуел, на секој натпревар. Постојано ме влечат и ме туркаат, па затоа мислам дека судењето беше слабо. На Светско првенство одлучуваат ситници. Против Бразил успеавме да ги свртиме таквите ситуации во наша корист, но денес сите спорни одлуки отидоа против нас“, додаде Халанд.
Берге: Ако ова е критериумот, тогаш секоја недела треба да добивам пенал
Незадоволен од судењето беше и играчот за врска на Фулам, Сандер Берге, кој истакна дека ваквите одлуки создаваат нејасен критериум.
„Ова треба да биде гол во секоја ситуација, но на крајот ситниците решаваат. Никогаш не знаете како ќе завршат ваквите ситуации. Ако ова е критериумот, тогаш јас треба да добивам пенал секоја недела во Премиер лигата“, рече Берге.
Сомнежи и за израмнувачкиот гол на Англија
Во норвешкиот табор се сомневаат и во регуларноста на израмнувачкиот погодок на Џуд Белингам. Според тврдењата што се појавија по натпреварот, топката можеби ја допрела жицата од системот „Spidercam“ непосредно пред акцијата што заврши со гол.
„Засега не сакам многу да зборувам за жицата, но ќе биде навистина смешно ако се покаже дека тоа навистина се случило“, изјави Берге.
Додека Англија се подготвува за полуфиналниот дуел со Аргентина, Норвешка, и покрај болната елиминација, може да биде задоволна од својот настап. Репрезентацијата стигна до четвртфиналето на своето прво Светско првенство по 1998 година, што претставува еден од најголемите успеси во поновата историја на норвешкиот фудбал.
