Кибернетичката група FulcrumSec тврди дека успеала да украде повеќе од еден терабајт податоци од фармацевтскиот гигант Novo Nordisk и дека дел од тие информации би можеле да бидат понудени за продажба, откако компанијата одбила да плати откуп од 25 милиони долари.

Групата, која се појавила во октомври 2025 година, во долга објава наведува дека повеќе од два месеци имала пристап до внатрешните системи на компанијата и континуирано извлекувала податоци. Според нивните тврдења, украдените податоци вклучуваат изворен код, интерни информации за развој и тестирање на лекови, податоци од клинички испитувања, како и информации за вработени, лекари и пациенти. Тие исто така тврдат дека пристапиле до податоци поврзани со производствени капацитети и интерни системи базирани на вештачка интелигенција.

Од Novo Nordisk потврдија дека бил забележан инцидент во сајбер-безбедноста на 11 јуни, при што биле компромитирани делови од интерните ИТ системи и одредени лични податоци. Компанијата наведува дека работи на заштита на своите системи и дека е во контакт со надлежните институции.

Хакерската група FulcrumSec тврди дека по одбивањето на компанијата да плати откуп, разгледува можност за „приватна продажба“ на дел од податоците, особено оние поврзани со одредени лекови и интерни процеси.

Сепак, групата посочила дека нема да објави дел од најчувствителните податоци, вклучувајќи информации за илјадници вработени и околу 11.500 пациенти кои учествуваат во клинички испитувања, како и податоци поврзани со производствените системи. Novo Nordisk е една од најголемите светски фармацевтски компании, позната по лековите за дијабетес и дебелина, меѓу кои „Ozempic“ и „Wegovy“.