Грчките власти најавија воведување на нов пакет мерки чија цел е да се забрза протокот на патници и товарни возила на граничните премини, како и да се намалат долгите задржувања на клучните премини Евзони и Кипи. Мерките доаѓаат како реакција на зголемениот сообраќаен интензитет, особено со почетокот на туристичката сезона и растечкиот товарен транспорт кон и од Грција.

Одлуката е донесена на работна средба во Солун, свикана од заменик-министерот за внатрешни работи Констандинос Гулекас, со учество на надлежни институции, безбедносни служби и локални власти од пограничните региони.

Според информациите, главната причина за мерките е значителниот пораст на бројот на патници во летниот период, како и засилениот товарен сообраќај кој создава дополнителен притисок врз граничната инфраструктура и предизвикува подолги чекања.

Дополнителен фактор е воведувањето на новиот европски систем Entry/Exit System, кој предвидува задолжителна биометриска проверка при влез и излез од Шенген зоната. Иако системот има за цел да ја зголеми безбедноста, неговата примена во пракса веќе доведува до подолги процедури на премините, особено во шпицот на сезоната. Грчкиот министер за заштита на граѓаните Михалис Хрисохоидис истакнал дека земјата мора целосно да ги почитува европските регулативи и дека нема простор за нивно одложување или заобиколување.

Тој додал дека веќе пристигнале реакции и поплаки од соседни држави, меѓу кои Северна Македонија и Србија, поради зголемените задржувања и подолгото време на чекање на границите, што ќе биде предмет на регионална координација. Со најавените мерки, грчките власти очекуваат подобра организација на граничните премини, поефикасно управување со сообраќајот и значително намалување на гужвите во периодот на најголем туристички притисок.