Градилиштето на улицата „Козјак“ во скопска Кисела Вода, каде вчера загина еден работник, немало соодветна заштита од нагло лизгање на земјиштето, утврдил Државниот трудов инспекторат по првиот увид. Во несреќата животот го загуби 34-годишен работник од Крива Паланка, а четворица негови колеги беа повредени.
Инспекторатот констатирал дека при ископот на јамата за станбен објект не биле преземени соодветни мерки за заштита и безбедност на работниците. Според првичните сознанија, состојбата била видлива и од фотографиите и видеата направени веднаш по несреќата.
Од Државниот трудов инспекторат зеле изјави од повредените работници. Според досегашните информации, и повредените и загинатиот работник биле пријавени.
Градилиштето е затворено од вчера. Градежните работи нема да можат да продолжат додека не се утврдат и спроведат мерки за заштита и безбедност на работниците.
Инспекторите најавуваат втор увид во понеделник, а во вторник се очекува да ја добијат и документацијата од фирмата изведувач „Компанија Јакимовски“ и од инвеститорот „НАР инвестмент“.
За да се спречи дополнително лизгање на земјиштето и можна штета врз соседните објекти, општинскиот градежен инспектор предложил итни мерки.
Тројцата повредени работници кои беа згрижени на трауматологија се во стабилна состојба и се пуштени на домашно лекување. Четвртиот повреден работник бил опериран и е во добра состојба.
Дозволата за изградба на станбено-деловен објект на улицата „Козјак“ број 4 е правосилна од 9 март годинава. Сопственик на фирмата инвеститор е поранешниот градоначалник на Општина Аеродром, Ивица Коневски.
Случајот повторно го отвора прашањето за безбедноста на градилиштата, инспекцискиот надзор и одговорноста на инвеститорите и изведувачите кога работниците се изложени на ризик.
