Од полноќ возачите ќе плаќаат повисоки цени за горивата, откако Регулаторната комисија за енергетика донесе нова одлука за поскапување на бензините и дизелот. Според новиот ценовник, ЕУРОСУПЕР БС-95 поскапува за 2 денари по литар, додека ЕУРОСУПЕР БС-98 и дизелот ќе бидат поскапи за 2,5 денари.
Со тоа, новата максимална цена на дизелот ќе изнесува 92 денари за литар, ЕУРОСУПЕР БС-95 ќе се продава за 87 денари, а ЕУРОСУПЕР БС-98 за 89 денари. Од Регулаторната комисија соопштија дека горивата во просек поскапуваат за 1,84 проценти.
Новите цени ќе важат од 19 мај во 00:01 часот:
- ЕУРОСУПЕР БС-95 – 87 денари за литар
- ЕУРОСУПЕР БС-98 – 89 денари за литар
- ЕУРОДИЗЕЛ БС – 92 денари за литар
Сепак, на дел од бензинските станици цените ќе бидат пониски поради попустите што ОКТА ги обезбедува за трговците. Со тие попусти, бензинот од 95 октани ќе чини 85 денари, 98 октанскиот 87 денари, а дизелот 89 денари за литар.
Поскапувањето доаѓа и покрај одлуката на Владата да ги продолжи антикризните мерки за горивата до 1 јуни. Во сила остануваат намалените акцизи од 2 денари по литар, како и повластеното ДДВ од 10 проценти за бензините. Од Регулаторната комисија посочуваат дека токму овие мерки биле вклучени во конечната пресметка на цените, што значи дека без нив горивата би биле уште поскапи.
Дополнителна неизвесност создава и движењето на цената на суровата нафта на светските берзи. Нафтата и денес се тргува по цена од околу 110 долари за барел, што продолжува да врши силен притисок врз домашниот пазар на горива. Во меѓувреме, се очекува Владата и енергетските компании да разговараат и за можно продолжување на попустите што ОКТА ги обезбедуваше за бензинските станици, а кои официјално истекуваат денеска.
