Ако секој ден му објаснувате на Gemini како сакате да изгледа текстот што го пишува, како да подготви извештај или во каков формат да ја анализира информацијата, наскоро нема да мора повторно да го пишувате истиот долг prompt. Google започна глобално да ја воведува новата функција Skills во Gemini. Идејата е едноставна: еднаш ги задавате правилата за одредена задача, ги зачувувате како „skill“, а потоа ги активирате кога ќе ви затребаат.

Најважната промена е што Skills постепено ќе ги заменат досегашните Gems. За личните Google сметки, Gems почнуваат да се укинуваат во ноември 2026 година. Google вели дека постоечките Gems автоматски ќе бидат претворени во Skills.

Наместо долг prompt – една команда

Замислете дека секој понеделник подготвувате извештај. Наместо секојпат да му пишувате на Gemini:

„Користи кратки реченици, почни со најважната информација, подели го текстот на пет делови, користи ваков тон, извлечи ги бројките и на крај направи краток заклучок…“ сите тие правила можете еднаш да ги зачувате како Skill.

Потоа во Gemini Chat можете да внесете / и името на Skill-от за да го активирате. Google најавува дека во иднина кратенката / ќе биде заменета со @. Уште поинтересно е што Gemini може автоматски да препознае кога одреден Skill е релевантен за задачата и да го примени.

Можете да комбинирате повеќе Skills

Google не застанува само на зачувување една група инструкции. Skills можат да се комбинираат. На пример, можете да имате еден Skill што го дефинира вашиот стил на пишување, друг со правила за одреден бренд и трет со структурата во која сакате да биде подготвен конечниот документ.

Gemini може да ги користи заедно за една задача. Тоа е важна промена во начинот на кој функционираат ВИ четботите: наместо секој разговор да започнува со објаснување „како сакам да работиш“, дел од тие правила стануваат трајно повторно употребливи инструкции.

Може да им дадете и сопствени документи

Skills можат да користат и референтни материјали. Google дозволува додавање текстуални документи, PDF-датотеки и слики за Skill-от да има постојан контекст за одредена задача. На пример, можете да креирате Skill за пишување во одреден стил и да му дадете документ со правила за тој стил.

Или Skill за подготовка на презентации што користи однапред зададени материјали.

Што ќе се случи со Gems?

Тука Google прави прилично голема промена. Gems, кои досега служеа за креирање персонализирани верзии на Gemini со сопствени инструкции, постепено ќе исчезнат. Роковите зависат од типот на сметката:

• лични Google сметки – ноември 2026;
• Workspace Business, Enterprise и непрофитни организации – март 2027;
• Workspace Education – јуни 2027.

Добрата вест за оние што веќе имаат креирано Gems е што Google вели дека тие автоматски ќе бидат претворени во Skills кога Gems ќе бидат укинати. Во истата транзиција, Google ќе го укине и експерименталниот алат Opal за создавање мини-апликации кај личните корисници, почнувајќи од ноември.

Но Skills засега немаат сè што имаа Gems

Иако Google ја претставува транзицијата како пофлексибилен начин за персонализирање на Gemini, постои важна разлика. Според официјалната документација, дел од функциите што беа достапни во Gems засега не работат со Skills, меѓу нив создавање видео, создавање музика, Canvas, Deep Research и Guided Learning.

Google најавува дека во следните недели ќе додава дополнителни можности, вклучително и споделување Skills со други корисници и користење датотеки од Google Drive и Gemini Notebook.

Gemini сака да престане да биде само четбот

Токму тука е суштината на промената. Класичниот ВИ четбот функционира така што секојпат му кажувате што сакате. Skills се обидуваат да го претворат Gemini во нешто повеќе, личен сет на алатки и работни процеси што еднаш ги поставувате, а потоа ги користите повторно. За некој што повремено му поставува прашање на Gemini, промената веројатно нема да биде драматична.

Но за луѓето кои секојдневно го користат за пишување, анализа, презентации или други повторливи задачи, разликата може да биде многу поголема: наместо да го пишувате истиот prompt десетици пати, еднаш го претворате во алатка. И потоа само ја повикувате кога ви треба.